Cousins, Apploader y Witch’s Apple Cider recibieron los tres Premium checos. El recuentu del palmarés oficial suma 14 distinciones repartíes ente ocho llagares: tres Premium, dos Plates y nueve Bronces.
La sidre checa dexó una muestra de la so diversidá nel 16º SISGA, celebráu en Xixón del 24 al 27 de setiembre. Los sos tres Premium reconocieron propuestes de categoríes bien distintes: sidre ensin alcohol, espumosa dulce con carbónico natural y sidre de copa seca con sabores.
Cousins recibió’l Premium de sidre ensin alcohol por Cousins Driver – Friendly. El llagar sumó un Bronce con Originál Suchý 2025, na categoría d’espumosa con carbónico añadíu brut. Na semeya que acompaña esti artículu vense los sos diplomes y el troféu del salón.
Apploader SRO algamó’l Premium con Opilý jabko y una Plata con Provoco Cider, dambes na categoría d’espumosa con carbónico natural dulce. Witch’s Apple Cider recibió’l tercer Premium checu por Magic Guelder-Rose 2025 Semi-dry, incluyida nel palmarés oficial como sidre de copa seca con sabores. Completó los sos reconocimientos con dos Bronces: Sweet Gold 2025, n’espumosa con carbónico añadíu semiseca, y Cherry Elixir 2025 Dry, en sidre con sabores ensin triba de carbónico indicada.
La segunda Plata checa foi pa Červenka, de Cidérka, n’espumosa con carbónico natural semiseca. Kvasírna Jara sumó dos Bronces, con Cidre Extra Brut 2020 en brut nature y Cidre Brut 2023 en brut, dambes con carbónico natural. Nesta última categoría recibieron tamién un Bronce Jablko, de Cider Bohemia, y Cidre Kliment Brut BIO 2017, de Cidrerie Kliment. Náčelník Cider completó’l balance con otros dos Bronces, pa Chmelený (Hopped) y 3Pepři (Peppered), nel apartáu de sabores ensin triba de carbónico indicada.
La participación nun se llendó a les sidres premiaes. El catálogu oficial incluyó tamién Jablko a květ bezu 2025 y Originál Polosuchý 2025, de Cousins; Cidre Kliment Demi Doux BIO 2018 y Demi Sec BIO 2018, de Cidrerie Kliment; y Bezva (Elder Flower), Hruškový (Perry) y Original, de Náčelník Cider.
Esta presencia checa completa’l repasu a los llagares más premiaos y a la participación de Madeira, y amplía’l panorama de la sidre internacional reunida en Xixón.
Entrega de los premios de Cousins nel SISGA 2026.
