A mayar si la mazana ta maduro.

Productores y ellaboradores adiquen un retrasu na maduración de la mazana d’unos quince díis a tres selmanes

LA SIDRA.- Los llagares asturianos trabayen a plenu rendimientu pa la prósima campaña de sidre. Sicasí, una bona parte esperimentaron demorances. El principal motivu ye pola mazana. Por mor del tiempu que fixo esti añu, la maduración entardó en llegar. Esta espublización entrugó a Campoastur pa saber la so opinión al respeutu. Dientru de tala coperativa esiste una seición de frutes y hortalices, qu’ampara tamién una organización de productores de mazana de sidre.

Al traviés de la llamada Agrupación de Tratamientos Integraos Agrícoles (ATRIA) de mazana, contrólense toles fases de cultivu y la entidá plania la producción y vienta de dicha fruta, cuntando con contratos con múltiples llagares del país. Esto convierte a Campoastur nel primer comercializaor de mazana de sidre.

Jorge García ye’l director téunicu de la entidá. “La mazana vien retrasao y esto yá se vía venir. La causa ye qu’hebio una demoranza nel floriamientu d’esti añu. Hai que remembrar que toviemos un iviernu abondo caldiu de temperatura. El fríu escomenzó en primavera, nos meses de marzu o abril. En marzu, por casu, hebio dos o trés temporales de fríu. Ello fixo que se retrasara’l floriamientu en quince díis y fasta en tres selmanes” desplicó l’especialista.

Esta espublización tamién entrevistó a una amuesa de llagareros pa saber cómo afeutó lo anterior a la so producción. La mayoría coincide en que, efeutivamente, la maduración de la mazana ta “entardando más ”.  Les sos valoraciones puen consultase nel númberu de la revista LA SIDRA d’esti mes.

Vamos siguir informando.