El plazu va tar abiertu fasta’l 26 de xineru | La Guía del Cachopu estrena tamién el concursu Meyor Fabada y Platos de Cuyar
LA SIDRA.- La Guía del Cachopu abrió oficialmente’l plazu d’inscripciones pal Concursu Internacional Meyor Cachopu del Mundiu 2026, que va algamar la so 15.ª edición, consolidáu como ún de los premios gastronómicos más influyentes pa la hostelería n’España y a nivel internacional. Los restoranes interesaos van poder inscribise fasta’l prósimu 26 de xineru.
El certame ye conocíu non solo pol so prestíu culinariu, sinón tamién pol so impautu direutu nel negociu de los restoranes participantes. Los establecimientos ganadores avecen esperimentar un aumentu notable de visibilidá y ventes, convirtiendo’l cachopu nun de los platos más demandaos de les sos cartes.
Nuevu concursu: Meyor Fabada y Otros Platos de Cuyar 2026
Como gran novedá, en 2026 ponse en marcha’l Concursu Meyor Fabada y Otros Platos de Cuyar, que va premiar la meyor fabada, el meyor pote asturianu y los meyores callos, col oxetivu de reivindicar la cocina tradicional asturiana y los sos platos más emblemáticos.
Dambos concursos van cellebrase a lo llargo del mes de marzu, con valoraciones a cargu d’un xuráu profesional del sector gastronómicu. La gran final podría cellebrase un añu más n’Uviéu, sede habitual d’esti tipu d’eventos, anque la ubicación definitiva va confirmase próximamente.
La inscripción nel concursu de fabada va ser de baldre pa los restoranes inscritos nel certame del cachopu. Amás, tolos participantes van tar incluyíos ensin costu na nueva Guía de la Fabada y Otros Platos de Cuchara, una plataforma online de promoción impulsada por La Guía del Cachopu.
Según el so director, Nacho Gancedo, “ganar esti concursu supón un enantes y un dempués pa munchos restoranes, tanto en clientela como en proyección mediática”.
Too ello con Sidra Cortina, por supuestu.
