La Fundación Asturies XXI y el Centru Integrau de Formación Profesional de hostelería y turismo en Xixón vienen de roblar un alcuerdu que crea un marcu estable de collaboración ente ambes entidaes pa xenerar actividaes formatives, culturales y divulgatives d’interés común. L’oxetivu ye aunar esfuercios pa poner en marcha cursos, talleres, charres y otres iniciatives que puedan resultar útiles pa dambes instituciones y que tengan un valor añedíu tanto pal alumnáu comu pal conxuntu de la ciudadanía.
LA SIDRA.- La Fundación Asturies XXI, dedicada al fomentu del desendolcu del territoriu asturianu y al espardimientu y preservación de la so cultura, ya’l CIFP d’Hostelería y Turismu de Xixón, centru públicu especializáu en formación nos ámbitos de la hostelería, el turismu y los servicios asociaos, comparten la visión de que la formación profesional tien de nutrise de la identidá del llugar nel que los futuros profesionales van exercer la so actividá. L’alcuentru ente cultura, territoriu y cualificación técnica ríquier la conocencia de los productos propios, la historia, les tradiciones y les peculiaridaes del país, aspectos que dambes instituciones consideren fundamentales nesta alianza.
Esti pasu formal de collaboración continúa la ruta marcada poles actividaes compartíes nos últimos años, ente elles el cursu de Sumillería de la Sidra o la celebración de tasties, charres divulgatives y esposiciones que contaron cola participación de profesionales y estudiantes. Con esti alcuerdu, dambes entidaes aspiren a consolidar un trabayu conxuntu que permita siguir ampliando la oferta d’actividaes y tresmitir al alumnáu una formación más fonda y venceyada a la realidá cultural asturiana.
