Campaña branu de la DOP Sidre d’Asturies

El Conseyu Regulaor de la DOP Sidre d’Asturies presentó la campaña branu de los productos acoyíos dientru la DOP

LA SIDRA.- El llema escoyíu foi ‘Xirar enantes d’echar’. Na presentación tovieren presentes el presidente del Conseyu Regulaor de la DOP Sidre d’Asturies, Guillermo Guisasola; el xerente de la entidá, Daniel Ruiz; la direutora xeneral de Desendolcu Rural y Agroalimentación, Begoña López; el direutor de l’axencia Arrontes y Barrera, Luis Arrontes; y la direutora de medios d’esta compañía, Elide García.

“Ye una campaña anovadora. Francióse cola tradición”, reconocíó Guillermo Guisasola. Pela so parte, Luis Arrontes, responsable del diseñu, desgranó les virtúes d’esta campaña “Quinxímos faer un diseñu que llame l’atención, reconocible y caltenible nel tiempu. Basémosmos na etiqueta y nel echáu, los dos ellementos diferenciaores d’esti productu. Trátase d’una illustración 3D, que ye tendencia nel mercáu. El verde y l’azul son los collores predominantes”, describió.

La estratexa de medios, desgranada por Elide García, ta empobinada a consumidores, chigreros y llagareros. Tará presente en televisión, radio, prensa, medios online y soportes offline (mupis, marquesines y autobuses), del 10 de xunu fasta la postrer selmana de setiembre.

Pel so llau, la direutora xeneral de Desendolcu Rural y Agroalimentación, Begoña López, punxo en valor la importancia d’apostar pol productu autóctonu. “Tenemos de siguir trabayando nestes sinerxes ente los eutores públicu y priváu. Creyo qu’esta campaña fidelizará al consumidor d’avezu y espertará unmayor interés nel públicu más mozu. Apostar pola DOP Sidre d’Asturies ye facelo pol orixe y la calidá”, concluyó.