La participación de Llucía Fernández Marqués en CiderCon®, n’Providence, sirvió pa presentar el proyectu Cider Cities y abrir víes de collaboración con asociaciones sidreres d’EE. UU., reforzando la proyección internacional de la sidre asturiana y el so papel como patrimoniu cultural compartíu
LA SIDRA.- La presencia de Llucía Fernández Marqués na CiderCon, celebrada n’Providence (Rhode Island, EE. UU.) a entamos de febreru, supunxo un pasu significativu na proyección internacional del proyeutu CiderCities
CiderCon ye güei l’eventu de referencia del sector sidreru n’América del Norte y un espaciu estratéxicu d’alcuentru pa productores, asociaciones, investigadores y profesionales venceyaos a la cultura de la sidre.
Demientres la so estancia nesti eventu, Fernández Marqués mantuvo dellos aconceyamientos con representantes clave del sector sidreru estadounidense. Ente ellos, con Christine Walter, presidenta de la Xunta Directiva de la American Cider Association, y con Monica Cohen, directora executiva (CEO) de la mesma entidá. Tamién se celebraron alcuentros con Paul Vander Heide, presidente de la Michigan Cider Association, asina como con miembros de la directiva de la New York Cider Association.
Nestos aconceyamientos esplicóse’l proyectu Cider Cities, una iniciativa que busca texer redes de collaboración ente ciudaes con tradición sidrera, fomentando l’intercambiu cultural, económicu y profesional ente territorios productores. L’oxetivu ye crear un marcu de cooperación estable que permita compartir esperiencies, bones práutiques y estratexes de promoción, dende una visión internacional de la sidre como productu cultural y patrimonial.
La idega despertó interés en tolos entrevistaos, quedando emplazaos a caltener el contautu por vía dixital pa concretar posibles collaboraciones y/o adhesiones. El proyectu interesó especialmente a los representantes de los sidreros de Nueva York, qu’agora mesmo trabayen nel procesu de reivindicar pa la so ciudá la capitalidá sidrera norteamericana, apoyándose nun sector en clara espansión, con un númberu creciente de productores, llagares y iniciatives venceyaes a la sidre artesana y de calidá.
Amás de los alcuentros institucionales, Cider Cities foi presentáu a dellos medios de comunicación internacionales presentes nel eventu, lo que supón un pasu importante pa dar visibilidá al proyectu y abrir nueves posibilidaes de collaboración futura.
La participación n’un foru como CiderCon pon de manifiestu’l potencial de la sidre asturiana pa integrase en redes internacionales, ensin perder la so identidá nin la so raigañu cultural. Nun momentu nel que la sidre gana presencia y reconocimientu a nivel mundial, la creación de vínculos con otres rexones sidreres del mundu permite reforzar el sector, intercambiar conocimientu y situar a Asturies nel mapa global de la sidre.
Iniciatives como Cider Cities apuesten por una visión abierta y collaborativa, onde la sidre nun s’entiende namás como una bebida, sinón como un elementu cultural compartíu, capaz de trespasar llendes y crear llazos ente territorios con histories y tradiciones diverses, pero con muncho en común.
