¿Compartimos vasu?

Cola pandemia del coronavirus, hai quien plantega acabar cola tradición de compartir el vasu sidre ¿Por qué?

LA SIDRA.- Anque los chinos nun seyan de tomar sidre, y los madrilanos tean fama de nun ser mui de compartir nin especialmente sidreros, tal paez que la tresmisión del Covid19 fuere por mor del compartir el vasu sidre… Curioso si camentamos que fasta agora’l nivel d’incidencia de la pandemia n’Asturies ye munchu más prósimu al norte d’Europa qu’al d’España.

El casu ye, que por “poco hixénico” que pueda resulta-yos a los non asturianos, la tradición de compartir el vasu de sidre, los asturianos, y más concretamente los sidreros nun tenemos un sesgu especial pa denguna enfermedá, ello ye, que nun hai denguna malura que seya más o menos frecuente ente nós qu’ente’l restu de la sociedá asturiana.

Nun hai dengún estudiu qu’indique que nin la gripe “normal”, nin les estremaes infeiciones víriques o bacterianes tean una prevalencia especial ente los que compartimos vasu… cierto que nel planu teóricu da la impresión de qu’esti compartir podríe ser un factor de riesgu, pero nun hai denguna evidencia científica, y estadísticamente nun se sostién -nin siquier s’apunta- denguna problemática especial por esti vezu de compartir vasu.

Y ye que puestos a compartir, de xuru hai más tresmisión de “miasmes” ente los viaxeros del metru n’hora punta qu’ente los sidreros que compartimos vasu. De fechu, nesi casu –nel del metru- si qu’hai estudios y estadístiques qu’amuesen la mayor incidencia de malures víriques y bacterianes ente los usuarios, colo que d’aplicase dalguna restrición sanitaria al compartir el vasu, enantes habríe qu’aplicala al compartir vagón de metru.

En tou casu, y como de curiase se trata y cola salú nun hai que xugar, que mos queden –esperamos- munches botelles por esfrutar, habrá que ser prudentes y mentes dura esta cris sanitario tendremos que llimitar el compartir vasu… por precaución y temporalmente.