Concursu Meyor Primer Sidre L’Añu

Pesia les restricciones impuestes pol andanciu, el concursu llevaráse a cabu’l prósimu 25 de marzu na sidrería La Montera Picona de Ramón, cumpliendo puramente con toles midíes de seguranza

LA SIDRA.- El prósimu xueves 25 de marzu va cellebrase la VII edición del concursu La Meyor Primer Sidre l’Añu. Un certame nel que van participar llagares procedentes de toa Asturies.

El llugar que va acoyer esti certame va ser La Montera Picona de Ramón, yá que ye una sidrería que cunta col espaciu abondu para la so celebración, amás de que dispon de toles midíes de seguranza precises pa torgar contaxos pola Covid-19. L’asistencia de públicu va tar llindada y controlada. Podrá realizase una reserva de plaza per rigorosu orde d’inscripción en info@lasidra.net. El concursu tamién va emitise online na direición https://www.youtube.com/user/INFOLASIDRA; y tamién n’Instagram: @revistalasidra.

La sidre ganador va poder esfrutase en dellos chigres de Xixón, los que yá tán confirmaos son: La Montera Picona de Ramón, Poniente, Nuevu Parque, Tírate al matu, Jaime, El Centenariu y El Veleru. Anque ye posible que s’amiesten más sidreríes y avisaráse de la so incluxón al traviés de la páxina ueb de la revista y de les sos redes sociales. Amás, demientres la selmana posterior al concursu y la siguiente, podrán canxease trés corchos de la marca ganadora por unu mázcaru con motivos sidreros.

Tocántenes al entamu del concursu, ésti rializaráse en dos fases. Na primera los miembros de xuráu van probar les marques participantes. En ca culín van buscar les cualidaes organoléptiques que tienen de carauterizar a una sidre nuevo. D’esta fase van salir les siete meyores sidres.

Na segunda etapa, la final, el tribunal tornará tastiar les sidres finalistes. En tou momentu esta tastia  va faese a ciegues y en ca preba camudará l’orde de les bébores, colo que s’asegura asina la imparcialidá dafechu del concursu.

Al rematar la tastia de les sidres, el xuráu va emitir el so veredictu. Si hai empate tornarán valorase les sidres cola mesma puntuación pa escoyer a la vencedora de tola prueba.

La sidre ganador va ser la oficial de la Primer Sidre l’Añu. El llagareru ellaborador va ser un de los invitaos a la naguración d’esti alcuentru, que tamién se llevará a cabu pesia les midíes restrictives impuestes pol andanciu.

Hai que destacar que demientres los sos siete años de vida, esti concursu llogró asitiase como un de los más singulares d’Asturies. En primer llugar porque ye l’únicu que se realiza sobro la sidre ensin trasegar, ello ye, na que nun se llevó a cabu la combinación de sidres d’estremaos toneles pa llograr un resultáu específicu.

De fechu, nos postreros cinco años varios llagares tornaron comercializar esta triba de productu. Una tradición que la Fundación Asturies XXI y esta revista buscaron recuperar y que, como s’aprecia po la evolución del concursu, ca añu va a más.