El xigante cerveceru que busca da-y puxu al consumu sidre

Heineken tresnó potentes campañes publicitaries pa estes feches n’América y el Reinu Xuníu.

LA SIDRA.- Les grandes tresnacionales cerveceres europees  tienenlo nidio: el consumu de sidre ye ca vuelta mayor nel mundiu y por eso quien el so parte del pastel. Una de les grandes empreses d’esti tipu, Heineken, apostó va trés años por introducir en países y zones americanes como México, Brasil, El Caribe ya inclusive Estaos Xuníos, la marca de sidre Strongbow.

La so intención yera captar el 50% del mercáu d’esta bébora en dichu continente. Les sos mires nun se cumplieron. Introducir la sidre como una bébora non estacional ye complicao. Sicasí, agora retomen esfuerzos y pa estes feches tán faciendo importantes campañes publicitaries pal consumu de cerveza, pero tamién, el de sidre. Y yá seya tantu n’América, como n’Europa.

Por casu, pa Halloween, Heineken llanzó al mercáu la campaña “Haunted Win” con distintes promociones nel Reinu Xuníu pa la vienta de Strongbow y con premios qu’inclúin viaxes a Praga. Y pa los Estaos Xuníos, la citada empresa yá ta peracabando una potente estratexa fubolera na que la sidre comparte protagonismu colos sos buques insinia cerveceros sol llema “What’s your play?”.

Fai namás un mes nel Salón Internacional de les Sidres de Gala, los llagareros internacionales qu’asistieron al alcuentru aldericaron na Xornada de Sumilleres sobro esta tema. Xustamente siñalaben que yera importante realizar un llabor d’educación ente la población, yá que  nun siendo que’l consumu de sidre tuviera impulsáu por una importante empresa tresnacional –xustamente citaron l’exemplu de Heineken–, yera abegoso llegar a tolos públicos. Pos dicha empresa cola so marca Strongbow nun se da nel so enfotu pa abrir camín. Avanza adulces pero con pasu firme. Va haber entós qu’abrir l’alderique sobro les implicaciones que trai. ¿Positivo o negativo? Y n’especial, ¿Positivo o negativo pa quién?