Entamu
Entama un nuevu añu y, con elli, l’inevitable exerciciu de marcar oxetivos que confiamos ver cumplíos a lo llargo de los prósimos meses. Nel mundiu la sidre asocede esautamente lo mesmo. Acullá de les cites habituales —eventos y cellebraciones que siempres aspiramos a ver medrar y meyorar—, hai cuestiones de fondu que lleven años enriba la mesa y otres que surdieron con más fuercia en tiempos recién, y cuya resolución sigue siendo imprescindible.
La falta de mazana asturiana, el necesariu reconocimientu profesional de los echaores, la reivindicación de la sidrería como pieza clave ya insepatrable del sector sidreru, la evolución y consolidación de les nueves sidres… y, penriba de too, el siempres pendiente Plan Estratéxicu de la Sidre y la Mazana. Un instrumentu básicu si realmente se quier avanzar con criteriu, planificación y visión de futuru, dexando atrás la improvisación, les ocurrencies puntuales y, nel peor de los casos, les yá conocíes redes clientelares que tantu dañu fixeron al sector.
L’añu pasáu, al calor de les cellebraciones derivaes del reconocimientu pola UNESCO de la Cultura Asturiana de la Sidre como Padremuñu Cultural Inmaterial de la Humanidá, anunciáronse iniciatives y llanzáronse promeses que, anque carentes en munchos casos de concreción, resultaron lilusionantes. Agora, col nuevu añu yá en marcha, llegó’l momentu de qu’entamen a traducise en fechos.
Les fiestes navidiegues recién concluyíes dexaron una imaxe, en xeneral, positiva: más sidre nes meses asturianes. Trátase d’una evolución lenta, pero firme, na que tanto la sidre natural como les d’espolleta ganaron presencia. Sicasí, convien nun cayer na autocomplacencia. Entá asistimos a demasiaes cellebraciones nes que la sidre nun taba presente en denguna de les sos espresiones, nin siquier solicitándola espresamente. Si queremos que la sidre ocupe’l llugar que-y correspuende, tamién tenemos de ser más esixentes como consumidores y como sector.
Xineru ye, amás, un mes d’espera. La sidre sigue’l so procesu de formientación nos depósitos y entá falten unos meses pa poder cellebrar la Primer Sidre L’Añu, probar la sidre nuevo y dar entamu a un calendariu fiestes, festivales y eventos sidreros que entamen de magar esi momentu.
Les perspeutives son bones, les promeses abonden y les espeutatives son altes. Agora namás falta que tol potencial se concrete n’avances reales, y que 2026 se recuerde como un añu de pasos firmes y non namás de bones intenciones. Hai muncho por facer, pero tamién voluntá y capacidá sobrada pa facelo. Qu’asina seya.
