Héroes de la Sidre

Nestos tiempos d’ andanciu tamos avezándomos a xestos pa honrar a toes aquelles presones que d’una forma o otra atópense na primer llínia na llucha escontra’l coronavirus, especialmente a los sanitarios y la Salú Pública; pero güei, dende LA SIDRA queremos homenaxear tamién a los auténticos héroes de la sidre, a los chigreros, a los echaores de sidre, a esa xente que pesia les dures circustancies sanitaries, sociales y económiques, esfuércense por afayase a les normatives sanitaries más esixentes, y que mos reciben cola meyor de les sorrises, faciendo tou un exerciciu d’enfotu y positivismu.

A ellos y a elles queremos agradecé-yos l’esfuerciu, ca sorrisa que mos dediquen tres la mazcarina que tienen que llevar tola xornada llaboral, agradece-yos el bon facer, l’ánimu, la esperanza que tresmiten; por servimos esa sidre ensin la que nun somos a vivir, por faer lo imposible pa que pesia’l distanciamientu y la frialdá qu’imponen les midíes sanitaries, los chigres sigan tresmitiendo’l so espíritu, el so ambiente, la so xermandía….. por que sigan siendo daqué vivo.

Son tiempos difíciles, y ye nestes circustancies cuando hai que saber apreciar más que nunca estes coses. Por eso, cuando mos apurran el prósimu culín, deamos-yos les gracies por tar ehí, pol so bon facer; y tomémoslu a la so salú, porque lo merecen.

[ngg src=”galleries” ids=”47″ display=”basic_slideshow” interval=”2000″ transition_speed=”503″] 

https://issuu.com/lasidra.net/docs/la_sidra_196