La Escuela de Sumillería de la Sidre de la Fundación Asturies XXI entamó ayeri’l so II Cursu de Sumillería de la Sidre, una propuesta formativa avanzada orientada a afondar nel conocimientu, la prescripción y la evaluación profesional d’esti productu emblemáticu. El programa tien como exa central el Panel de Tastia, concebíu como una ferramienta clave pa la formación sensorial y la profesionalización del sector sidreru.
Na inauguración del cursu, el presidente de la Fundación Asturies XXI, Marcos Abel Fernández, destacó non solo’l valor cultural ya identitariu de la sidre, sinón tamién el so potencial económicu. Fernández incidió na necesidá de que l’entornu sidreru asturianu avance y s’adapte a los tiempos actuales, alvirtiendo de que, de nun facelo, “acabaremos por ser una reserva india pa que nos visiten los turistes”. Nesti sentíu, subrayó la importancia de formar profesionales capacitaos pa entender, valorar y comunicar la sidre con criteriu.
La primer xornada llectiva contó cola intervención de Lluis Benito García, profesor de la Universidá d’Uviéu y direutor de la Cátedra de la Sidre, quien ufiertó un ampliu repasu a la historia de la sidre n’Asturies. Na so esposición, trazó la evolución d’esti productu dende un consumu fundamentalmente caseru o comuñal hasta’l so gran espardimientu a entamos del sieglu XX, momentu nel que’l xorrecimientu del cultivu de mazana llegó a desbancar el comerciu de cítricos y favoreció inclusive la esportación a Europa.
Amás, destacó’l papel social que adquirieron les espiches y romeríes nesa dómina, convertíes en eventos de primer orde, tal y como recueye la prensa de la época. Tamién fixo referencia a l’impactu del réxime franquista, que provocó l’aislamientu d’Asturies, la fin del comerciu internacional y importantes cambeos sociales que derivaron, ente otros efectos, nel abandonu progresivu de les pumaraes por falta de rentabilidá, un procesu cuyes consecuencies entá se sienten na actualidá.
La xornada completóse con una parte práutica dedicada a la formación sensorial, na que los alumnos trabayaron na identificación de sabores básicos y participaron nun primer panel de tastia. Nesta sesión evaluáronse, ensin identificar les marques, cuatro sidres presentes anguaño nel mercáu, analizando con detalle les sos cualidaes organoléptiques.
El programa del cursu va continuar el próximu 26 de marzu y desenvolverase tamién los xueves 9, 16, 23 y 30 d’abril, y 7, 14, 21 y 28 de mayu, en horariu de 18:00 a 20:30 hores. La formación combina’l trabayu práuticu del panel de tastia con conteníos teóricos impartíos por especialistes venceyaos al mundu de la sidre, la gastronomía y la investigación sensorial.
Ente los ponentes destaquen el propiu Lluis Benito García, Donato X. Villoria, espertu en sumillería aplicada a la sidre, y Esteban Blasco, enólogu del Llagar Valverán, quien abordará les particularidaes de la sidre de xelu. El programa complétase cola participación del investigador Marcos Abel Fernández, la química y enóloga Cristina Castaño, el sumiller Ricardo del Río y l’especialista en maridaxe Lluis Nel Estrada.
Amás, inclúise un taller teóricu-práuticu d’escanciáu y serviciu impartíu pola campeona echadora Laura Ovín, asina como una visita téunica con tastia al Llagar Valverán.
