La sidre asturiana será l’elementu central de la segunda edición d’AsturFeria, que se va celebrar del 1 al 3 d’agostu en Valencia de Don Juan -Llión-. L’alcuentru, organizáu pol Conceyu coyantín en collaboración con entidaes asturianes, Va tener como momentu más esperáu les tradicionales espiches populares, un símbolu de comunidá, gastronomía y cultura n’Asturies.
La feria va dar entamu el vienres 1 d’agostu a les 20:00 hores, cola llectura del pregón a cargu del teniente d’alcalde d’Uviéu, Mario Arias. De magarles 20:30 hores, va celebrase la primer espicha gratuita, onde se va sirvir sidre pa tolos asistentes fasta agotar esistencies. L’ambientación va tar amenizada pola Banda de Gaites Ciudá d’Uviéu, que va ofrecer un conciertu a les 21:00 hores.
El sábadu 2 d’agostu, la sidre tornará al centru de la xornada con una segunda espicha a les 13:30 hores, acompañada de pasacais, talleres pa neños (como’l d’ellaboración de sidre’l duernu a les 11:30) y actividaes culturales venceyaes a la tradición sidrera. Nesi marcu va rindise un homenaxe al conceyu asturianu de Salas y va entregase’l gallardón de Paisano/a d’Honor a Covadonga y Mariol Monte Bros.
La programación completaráse con un mercáu de productos asturianos, una esposición sobro l’azabache y una actuación musical del grupu El Refugio del Pop, dientru’l ciclu Noches del Castillo.
El domingu 3 d’agostu pondráse’l ramu a la feria con más animación pa los más pequeños, recreación mitolóxica, y una degustación de bollos preñaos con vinu Prietu Picudo ente les 11:00 y les 15:00 hores.
Con espiches, sidre y tradición, AsturFeria 2025 reafítase como un escaparate cultural qu’ufierta una esperiencia auténtica d’Asturies nel corazón de la contorna llionesa. Una cellebración del sentimientu asturianu, al rodiu d’un vasu sidre.
