La fototeca LA SIDRA, un proyeutu innovador

Esta iniciativa, puesta en marcha pola Fundación Asturies XXI en 2021, recueye yá cuasique un millar d’imaxes y cartelos publicitarios rellacionaos cola cultura sidrera asturiana.

LA SIDRA.- Pa poder contestualizar la importancia que tuvo la cultura sidrera asturiana a lo llargo la hestoria anicióse la Fototeca LA SIDRA, un proyeutu, puestu en marcha pola Fundación Asturies XXI, cola collaboración de la Conseyería de Cultura, Política Llingüística y Turismu del Principáu d’Asturies; la FMCEUP de Xixón; l’asociación fotográfica Asemeyando; y la revista LA SIDRA, que tien como principal oxetivu la recuperación, dixitalización, contextualización y centralización de material gráficu y, dende esti últimu añu, tamién documental rellacionaos col mundiu la sidre y dataos enantes de 1980.

Dende la so puesta en marcha en 2021, esti proyeutu, con cuasique un millar d’imaxes y cartelos publicitarios que constitúin un material etnográficu y hestóricu de primer orde y que, gracies a la so recuperación y dixitalización, garantiza la so perdurabilidá nel tiempu, amás de consiguir la so centralización nun espaciu abiertu al públicu como ye’l Muséu del Pueblu d’Asturies y al traviés de la páxina web www.lasidra.net/Fototeca.

Con esta iniciativa innovadora, la intención ye dar una llombarada a la candidatura de la cultura sidrera asturiana como Padreimuñu Inmaterial de la Humanidá de la UNESCO y poner en valor eses imaxes que, quiera que non, vanse perdiendo col pasu del tiempu.

Semeyes rellacionaes cola mazana, los chigres, los llagares, les espiches… ello ye, col mundiu la sidre polo xeneral, a les que se-yos da una contestualización histórica, social, xeográfica y etnográfica, apurriendo una ficha técnica lo más refecha posible na que s’incorpora: autor, fecha, llugar, procedencia, observaciones, perspeutiva de xéneru –teniéndose, especialmente, en cuenta la presencia femenina como suxetu social activu–, fonte d’ingresu y fecha d’ingresu.

Por tou ello, la fototeca LA SIDRA, un proyeutu en continuu desendolcu y de calter tresversal, na midía na que el material recoyío resulta d’interés pa toles edaes y estratos sociales, consolidóse como un gran recursu pa impulsar la cultura sidrera asturiana, yá que gracies a la dixitalización n’alta definición asegúrase’l caltenimientu de la imaxe anque la orixinal piérdase o deteriórese.