Dientru los actos del 50 aniversariu de la Sidrería Yumay, la Fundación Asturies XXI en collaboración cola Asociación Rei Pelayo, y los Gastrónomos del Yumay entamen un taller d’echar sidre nel que van participar persones con discapacidá intelectual.
LA SIDRA.- En pallabres de Marcos Abel Fernández, presidente de la Fundación Asturies XXI “la cultura asturiana de la sidre ye de por sí integradora, pero con esta iniciativa sedrálo d’una forma cosciente, incluyendo nun mesmu espaciu participativu a persones con capacidaes intelectuales distintes”.
La iniciativa, pionera nel mundiu la sidre, consiste na cellebración d’un taller pa deprender o ameyorar l’arte d’echar sidre, nel que van participar en condiciones d’igualdá persones con distintes capacidaes intelectuales, ensin segregaciones de denguna triba.
L’orixe d’esta idega parte del conocíu gastrónomu y comunicaor Carlos Guardado, y va ser desendolcada gracies a la collaboración de l’asociación pa persones con discapacidá intelectual Rei Pelayo, la Fundación Asturies XXI, los Gastrónomos del Yumay y la mesma Sidrería Yumay, dientru los actos de cellebración del so 50 aniversariu, que cede el so instalaciones, y beca la participación de miembros d’esti centru nel taller.
Nel actu de presentación, el conceyal Pelayo García manifestó’l so sofitu a esta iniciativa y destacó como “la sidre iguálamos nel mesmu vasu”. Pela so parte, Mari Cruz García, presidenta del Rei Pelayo, espresó’l so prestu por esti proyeutu socialmente integrador y manifestó el so convencimiento de que Lo van a pasar perbién y dir a faer xenial”. Pela so parte Justo García, propietariu de la céllebre sidrería Yumay de Villalegre, amestó que “Fuimos pioneros en formar a camareros n’echar sidre. Diba años que dexamos de faelo, y agora faimos muncha ilusión recuperalo con esta iniciativa”.
El taller va tener llugar el prósimu miércoles 14 de mayu a les 19:30 na Sidrería Yumay, tien un costu de 10 €, y va ser impartíu por Laura Ovín, echaora de reconocíu prestixu, mayestra con formación pedagóxica y amplia esperiencia nesta triba talleres.
