La entrega añal de premios de la Asociación Centro Cultural Balada convertióse nuna celebración de la cultura asturiana y xixonesa, cola sidre como protagonista al concentrar bona parte de los reconocimientos de la gala
LA SIDRA.-L’Asociación Centro Cultural Balada entregó ayeri los sos premios añales y inauguró la esposición Asturies y Transilvania, xuníes pola sidre y la montaña, nuna gala qu’aconceyó a representantes de tolos ámbitos culturales y del asociacionismu xixonés y asturianu. Como nun podía ser d’otra mena, la sidre tuvo un llugar perimportante nos galardones d’esta edición.
La xornada cellebróse na sede social de l’Asociación Balada, que quedó piqueña ante la gran cantidá de públicu y de persones reconocíes. La organización entregó premios nes estayes de poesía, música y cantautoría, comunicación, redes sociales, asociacionismu y cultura sidrera, amosando la diversidá d’un texíu cultural que xorrez añu tres añu.
La revista LA SIDRA destacó especialmente al recibir un reconocimientu múltiple. D’una banda, les redactores y collaboradores Susana Sela, Carme Pérez y Llucía F. Marqués fueron distinguies na categoría de profesionales de la comunicación. D’otra, la propia publicación consiguió un reconocimientu al figurar tamién dientro de la estaya de Cultura Sidrera, lo que reforzó’l so papel referencial na divulgación del mundu de la sidre.
Nel mesmu separtáu de Cultura Sidrera fueron reconocíos Ana María Viciosa “Ciderayalga”; Raúl Moro, de l’Asociación de coleccionismu sidreru Sidrastur; y Fernando Paredano, de La sidra de papel..
La sidre tamién tuvo representación na categoría d’influencers, cola distinción pa Jackeline Marcano “Ladygastro”, y nes lletres de los intermedios musicales, onde dellos cantautores animaron la gala con pieces en direutu.
L’eventu punxo’l ramu con una preba de sidres asturianes y transilvanes, acompangaes de llambionaes rumanes, un xestu que reforzó’l espíritu de xermandía que marcó tol actu.
Al empar de la ceremonia inauguróse la esposición Asturies y Transilvania, xuníes pola sidre y la montaña, disponible na sede de l’Asociación. La muestra visibiliza les semeyances pente dambos territorios y ye una invitación a conocer paralelismos culturales y paisaxísticos.
