Los echaores aficionaos, protagonistes de la tercer xornada de la Primer Sidre l’Añu

Los echaores  -de toles edaes- foron protagonistes d’esta xornada, na que tamién hebio tasties guiaes, mayada de sidre, xuegos tradicionales, música y por supuestu, mares de sidre

El bon tiempu acompangó ya’l prau de la fiesta enllenó a rabiar, families esfrutando del bon facer de la Parrilla El Pinchu, reciella xugando, grupos de collacios compartiendo sidre y espertos sidreros evaluando tolos palos posibles de sidre. 

Pente les actividaes complementaries, de les que más prestaron foi la  mayada de sidre, que lluéu se compartió pente’l públicu, y les tasties guiaes de sidre y d’otros productos venceyaos a la mesma d’una u otra mena.

D’ente les tasties realizaes llamó l’atención especialmente la de Cerveza Ordum, fecha con llevaura de sidre, y la de Sidra Roza, Sidre Oficial de la Primer Sidre l’Añu.

Pero los protagonistes del díe foron los echaores, col primer concursu nacional d’Echaores Aficionaos, nel que participaron 25 persones, quedando munchos con ganes d’entrar en concursu y teniendo participantes de toa Asturies y bona parte’l mundiu (Arxentina, Ucrania, Andalucía, Euskadi, Galicia…). Uviéu arrasó nos premios, con dos podiums, pero el primer puestu foi a parar a Llugones. 

Güei ye la cabera oportunidá d’esfrutar de la XIII Primer Sidre l’Añu, de doce a seyes de la tardi, y amás si vienes en bici la entrada ye de baldre. Comu actividá principal, güei tendrá llugar el XII Concursu de Sidre Casero Fecho en Maera, qu’atraerá a la Primer Sidre l’Añu los meyores llagares non industriales de toa Asturies, una ocasión perbona pa intercambiar con ellos los secretos de la sidre meyor fecho.