Mañana entama’l 15º Salón Internacional de les Sidres de Gala (SISGA), que va celebrase del 25 al 28 de setiembre y nel que van tar presentes más de doscientes sidres procedentes de 68 llagares de 18 países.
LA SIDRA – Esti gran alcuentru sectorial xunta a profesionales de la sidra de tol mundu: importadores, esportadores, hosteleros y comunicadores. El SISGA, que dende los sos entamos escoyó Xixón como sede, consolidóse como referente internacional del sector sidreru, al empar que ufierta al públicu xeneral la posibilidá de participar en delles de les sos actividaes.
La inaguración va tener llugar mañana a les once de la mañana nel Hotel Tryp Rey Pelayo, cola presentación a cargu de Marcos Abel Fernández, presidente de la Fundación Asturies XXI, y la tastia inagural dirixida pol llagareru irlandés Eamon Lucey (Sidra Stonewell).
Les actividaes de la tarde van desendolcase en Villaviciosa y Nava, con visita al Llagar Cortina y al Muséu de la Sidra d’Asturies. Ellí, los participantes, amás de percorrer les istalaciones, van ser recibíos pol alcalde, Juan Cañal, y van participar nuna mesa reonda sobre les posibilidaes del turismu venceyáu a la sidre y la mazana, compartiendo esperiencies de distintos países.
Como anticipu, esta tarde va tener llugar nel CIFP d’Hostelería y Turismu de Xixón una actividá de la Escuela de Sumillería, centrada nes sidres de xelu y de fueu, cola participación d’Alfonso Castañón (enólogu del Llagar Castañón), Juan Luis García y Benedicta Zurro, dambos profesores del centru. La xornada va culminar con una visita guía al Llagar JR.
El programa d’actividaes del SISGA ye intensu y completu, y busca, en namái cuatro díes, ufiertar a los participantes internacionales la visión más amplia y veraz de la Cultura Asturiana de la Sidra. Asina, van facese visites a llagares, museos, pomaraes y sidreríes; cates guíaes; alderiques sobre’l sector y el so futuru; actos institucionales; y un acercamientu a la gastronomía asturiana al traviés de Alimentos del Paraísu.
Pa’l públicu xeneral, la cita principal va ser la Preba Abierta al Públicu, un puntu d’alcuentru con sidres de tol mundu que constitúi una oportunidá única de consiguir, polos diez euros que cuesta la entrada, una imaxe global de l’actualidá sidrera mundial. Los asistentes van poder degustar más de 200 productos sidreros —ca ún más sorprendente— de la man de los sos propios ellaboradores, ya inclusive mercar dalgunos: sidra brut, espumosa, de mesa, de xelu, de fueu, semiseca, en vermú o aguardiente, ente otres variedaes.
La Preba Abierta va celebrase’l sábadu 27 nel Pabellón de Congresos de la Feria Internacional de Mueses d’Asturies, coincidiendo cola feria AGROPEC, en horariu de 12:00 a 15:00 hores y de 17:00 a 20:00 hores. Amás de la esposición y la cata de productos, esa mesma xornada van celebrase diverses presentaciones de sidres abiertes al públicu a cargu de los sos productores.
PROGRAMA XUEVES 25 SETIEMBRE
MAÑANA
- 11:00 h. Naguración.
- Presentación del 15 SISGA a cargo de Marcos Abel Fernández Marqués, Presidente de la Fundación Asturies XXI.
- Tastia nugural de sidre Stonewell (Irlanda), a cargu d’Eamon Lucey.
- 13:00 h. Salida bus a Villaviciosa. Llagar Sidra Cortina.
- 14:00 h. Receición y visita al llagar Cortina, con tastia guiada de Sidre de Xelu a cargu de Tino Cortina.
TARDI
Muséu de la Sidra d’Asturies, Nava
- 16:30 h. Receición oficial por parte de Juan Cañal (Alcalde de Nava) y Juan Stové (Direutor del Muséu de la Sidre d’Asturies).
- 17:00–18:30 h. Mesa redonda ‘Turismo vinculáu a la sidre y la mazana’.
Turismo Xixón
Asnate Ziemele. Baltic Cider. Letonia
Mariana Santos -Cider Cities
Mª José Valente. Portugal
- 18:30 h. Degustación de vermuts / compuestes de sidre. Visita a Exposición de Semeyes LA SIDRA y al Muséu de la Sidre.
- 21:00 h. ‘De chigres per Nava’. Visita a sidreríes..
