Manifiestu pola cocina asturiana

Una iniciativa que ximielga los pegollos del seutor alimentariu asturianu, y qu’afeuta especialmente a la sidre y a los chigres

LA SIDRA.- El ‘Manifiestu pola Cocina Asturiana’ del que son promotores  David Montes y Borja Alcázar, cocineros, xunto con David Castañón y David Remartínez, escritores de la rama, apadrinaos por José Antonio Campoviejo y por Nacho Manzano, recueye doce principios y un decálogu d’encamientos pa caltener viva la tradición gastronómica del país.

“L’ alimentación ye un circuitu económicu, pero tamién históricu, social ya identitariu, con implicaciones fundamentales na calidá de vida de los nuesos vecinos y vecines, y por supuestu, nel futuru de la nuesa tierra”

El Manifiestu, que vien de presentase’n Xixón ye un documentu col que dos cocineros y dos escritores gastronómicos revindiquen la cocina asturiana comu pegollu económicu y cultural, amás de comu recursu turísticu, afalando a tolos esllabones de la cadena alimentaria asturiana a implicase nel consumu de productos asturianos, faciendo rial conceutos comu economía circular, caltenibilidá o productu de cercanía, mui utilizaos de pallabra pero pocu presentes nel díi ente díi de l’alimentación.

Tradición, economía y turismu amiéstense nesti manifiestu, qu’afita la cultura asturiana de la sidre y defende l’emplegu de terminoloxía asturiana pa platos y productos, encamentando la recuperación de recetes y fórmules vieyes de la cocina tradicional.

El manifiestu afeuta non solo a la hostelería asturiana, sinon al conxuntu de seutores venceyaos d’una o otra miente col seutor alimenteariu: “agricultores, hosteleros, ganaeros, llagareros, vinateros, pescaores, distribuidores, comunicadores, tresportistes y camareros”.

Destacar ente les sos propuestes, l’aniciu d’una llexislación que permita que los pequeños productores puedan vender direutamente a la hostelería.