Ye d’agradecer cuando una propuesta nueva entra dientru les cartes de los nuesos chigres, especialmente si respeta la llínia de los saborgos propios, xugando con ellos.
Imaxina-y que facéis una hamburguesa, pero sustituyís el pan por un tomate de tamañu considerable, vaciáu de les sos pebides; y qu’en llugar de la carne avezao, rellenamos con carne mechao y acompangamos colos consabíos complementos vexetales.
El resultáu, aparte d’orixinal, ye una esperiencia gastronómica perinteresante, na que’l frescor del tomate ye lo primero n’atacar el paladar, preparándolu con un toque d’acidez pal españíu saláu y escepcionalmente xugosu de la carne mechao, esconsoñando de guelpe toles papiles gustatives.
Depués d’ello, el pitu fritu con patates del segundu platu, por bono que tuviera, pierde un pocu la gracia, pero el postre de brazu llambión, caseru, dolce ensin repunar y esponxósu por demás, pon el remate definitivu a esta propuesta. Acompañamos con sidra Roza y Prau Monga, de Viuda d’Angelón, bien echao polos camareros de Casa Dominganes..
Casa Dominganes- Plaza Dominganes – Nava. T. 684 63 70 70
