18 socios fundadores y cuasique una decena de llocalidaes implicaos nel ñacimientu de l’asociación, que busca recuperar la tradición de facer sidre, reforciar les espiches y recuperar pumaraes
LA SIDRA.- La casa natal d’Armando Palacio Valdés, n’Entrialgo, un llugar cargáu d’historia, foi la sede qu’escoyeron dellos vecinos productores de sidre pa presentar oficialmente la recién creada Asociación de Sidre Casero y de la Mazana del Altu Nalón, una iniciativa que naz col espíritu de recuperar tradición, fortalecer la comunidá y poner en valor la cultura sidrera d’esti territoriu. En total, 18 persones participaron nesti primer alcuentru fundacional, que combinó idegues, proyeutos y un compromisu compartíu. L’asociación cuenta yá con socios de dellos pueblos como Grandiella, Barredos, Canzana, La Pola Llaviana, La Brañueta, Tolivia, La Ferrera, Ribota y Prieres, habiendo tamién interés por parte de productores de Llangréu.
L’envís col que ñaz esta asociación ye dinamizar la vida social y cultural alredior de la sidre, impulsando actividaes, formación y espacios d’alcuentru que devuelvan protagonismu a les pumaraes, los llagares familiares y a les espiches.
Los sos oxetivos son, en primer llugar, protexer y dignificar la sidre casero, una tradición bien arraigonada na cuenca’l Nalón. Tamién quien defender les mazanes y les pumaraes, fundamentales pal paisaxe y la economía rural de la fastera.
Busquen reactivar pumaraes abandonaes y animar a volver usar llagares que quedaron paraos tres el pasu de les xeneraciones. La sidre, recuerden, forma parte de la memoria coleutiva de munchos pueblos del valle.
Otra de les llínies de trabayu va ser la formación, tanto nel curiáu y xestión de pumaraes como na ellaboración de sidre. De fechu, entamen yá cola primer actividá el sábadu 14 de marzu, un cursu de frada de pumares que marca l’entamu d’un programa formativu más ampliu.
Pa fomentar la participación de la mocedá cuenten entamar amagüestos y actividaes escolares pa los más nuevos.
Pero si hai un elementu simbólicu que quien recuperar con especial fuercia son les espiches caseres. Llaviana y Samartín del Rei Aureliu son los dos únicos conceyos d’Asturies que cunten con una normativa específica pa regular esti tipu d’alcuentros gastronómicos, permitiendo abrir al públicu una casa en zona rural pa vender sidra casera acompañada de determinaos platos: tortiella, empanada, güevos cocios, chorizu o los conocíos conceyales de bacalláu.
La nueva asociación quier dar exemplu entamando una espicha esta primavera que valga pa recuperar esi ambiente festivu y comunitariu.
