El Principáu promociona los Alimentos del Paraísu Natural, la cultura sidrera y la música asturiana nel Festival Intercélticu de Lorient, con un puestu onde s’echa y reparte tolos díes sidre—de la marca Prado y Pedregal, representante de la DOP Sidra d’Asturies— ente los asistentes al festival, procedentes de distintos países de tradición celta.
El Gobiernu d’Asturies da a conocer la cultura sidrera, la música del país y la marca Alimentos del Paraísu Natural nel Festival Intercélticu de Lorient, que se cellebra en Bretaña hasta’l 10 d’agostu, apostando pola proyección internacional de la cultura asturiana con una presencia destacada nel festival, cuntando con una delegación artística amplia, promoción gastronómica ya información turística nel principal eventu celta del mundo, qu’acomuña ca añu a más de 900.000 persones.
La directora xeneral d’Agricultura, Agroindustria y Desendolcu Rural, Begoña López, visitó ayeri l’estand del Principáu, onde s’amuesen productos asturianos y se reparte sidre tolos díes de la man del echadoMarcos López col envís de a dar a conocer la sidre asturiana –bien desemeyada a la bretona- y la cultura venceyada a esta bebida, asina comu visibilizar la so declaración como Padremuñu Inmaterial de la Humanidá pola Unesco. “Ye un escenariu únicu nel qu’aprovechamos pa falar d’Asturies, pa falar de la cultura asturiana, de la nuesa gastronomía, de la cultura de la sidre, especialmente nesti añu tan importante nel que foi reconocida pola Unesco y pa dar puxu a la nuesa cultura a traviés de les nueses bandes y grupos folclóricos nesti gran escaparate”. Dende la villa bretona, Begoña López señaló la especial rellación ente la música y la sidra n’Asturies, que incluye práutiques sociales, rituales y celebraciones, y que fai del país “un verdaderu paraísu de tradiciones, con una cultura viva y compartida”.
La delegación asturiana cuenta esti añu con una representación artística amplia, con músicos y grupos como Alienda, Bada & Muñalén, Eva Tejedor y Les Pandereteres, Guieldu, Marisa Valle Roso, Pablo Carrera y Rubén Bada, amás de la banda de gaitas La Reina’l Truébano y el grupu de baille San Félix de Candás. La so participación en conciertos, desfiles y otros actos ayuda a dar visibilidá al talentu asturianu fora del país.
El Principáu vien apoyando dende hai años la presencia d’Asturies en Lorient, con un sofitu costante tanto institucional como artísticu, concediendo añalmente la Conseyería de Cultura, Política Llingüística y Esporte una sovención a la Asociación Festival Intercélticu de Lorient.
