“Cuando vemos que un eventu como esti medra y se consolida, lo que vemos ye que la nuesa cultura sigue viva, fuerte y con futuru”. Abel Junquera
“La Primer Sidre l’Añu contribúi a democratizar la sidre”. Marcos Abel Fernández
La XVI edición de la Primer Sidre l’Añu va celebrase del 2 al 5 d’abril nel Recintu Ferial Luis Adaro, concretamente nel Pabellón Asturies y nes zones esteriores anexes.
La presentación oficial tuvo llugar esta mañana na Casa Paquet, onde se dio a conocer el programa y les actividaes d’esta nueva edición. L’eventu abrirá les sos puertes el xueves 2 a la una del mediudía col pregón, que esti añu va tar a cargu de la Plataforma contra la contaminación de Xixón, incorporando asina un marcáu conteníu social.
Nel actu participaron Marcos Abel Fernández, presidente de la Fundación Asturies XXI; Abel Junquera, conceyal de Participación Ciudadana y Distritos; Antonio Migoya, secretariu xeneral de la Fundación Rural Gijón —entidá collaboradora—; Juan Luis García, miembru del xuráu; y Germán Guardado, de Sidra Germán, que la so sidre va ser la oficial del eventu.
Abel Junquera abrió’l turnu d’intervenciones destacando’l valor cultural de la cita:
“Nun ye solo tradición, ye identidá. Cuando vemos que un eventu como esti medra y se consolida, lo que vemos ye que la nuesa cultura sigue viva, fuerte y con futuru”. Amás, reiteró’l compromisu del Ayuntamientu de Xixón, que otorgó a la Primer Sidre l’Añu’l calter d’eventu de raigame social y la so condición de sede estable.
Pela so parte, Marcos Abel Fernández incidió nel calter popular del eventu, definiéndolu como “una espicha tradicional na que se xunten families y grupos d’amigos pa probar la sidre nueva y pasalo bien”. Destacó amás que la cita recueye tolos elementos propios de la cultura asturiana: música tradicional, tonada, xuegos infantiles, gastronomía, pruebes de sidre, deportes tradicionales, mayada de sidra, clases y concursos d’escanciadores.
El presidente de la Fundación recordó tamién los oxetivos colos que nació l’eventu: fomentar la cultura sidrera, recuperar les espiches de Selmana Santa y poner en valor la sidre sobre la madre. Nesti sentíu, destacó l’éxitu de recuperar la costume de consumir y embotellar esti tipu de sidre.
Asina mesmo, señaló que la Primer Sidre l’Añu contribúi a “democratizar la sidre”, facilitando la visibilidá de pequeños llagares que tienen más dificultaes pa llegar a los mercaos.
Nel ámbitu musical, l’eventu va contar cola participación diaria de la Banda de Gaites El Gumial, amás d’actuaciones cada tarde a les siete con propuestes como pandereteres, Ún de Grao, Rollu Folk, Mon García o tonada.
Mientres la presentación tamién se confirmó la participación de la Plataforma contra la contaminación de Xixón como pregonera, reforzando’l venceyu del eventu cola sociedá xixonesa.
Marcos Abel Fernández sorrayó amás que, anque ye un eventu pensáu dende y pa Asturies —col asturianu como llingua vehicular y un calter participativu—, atrae a munchos visitantes de fuera que busquen un turismu de calidá, basáu na integración, el conocimientu y la participación na cultura local.
Juan Luis García, profesor del CIFP d’Hostelería y Turismu de Xixón y miembru del xuráu, destacó l’alta calidá de les sidres presentaes, asina como’l calter frutal y equilibráu de la ganadora.
Pela so parte, Germán Guardado, llagareru premiáu, agradeció’l reconocimientu y la llabor de la Fundación Asturies XXI. Antonio Migoya, en representación de la Fundación Caja Rural, felicitó al ganador y recordó que la declaración de la cultura sidrera como Patrimoniu de la Humanidá implica un compromisu permanente.
El funcionamientu va ser asemeyáu al d’otros años: per mediu d’una pulsera, con un costu de diez euros, los asistentes van poder degustar llibremente la sidre de los llagares participantes y acceder a toles actividaes.
Como cada añu, la entrada va permitir participar en talleres d’escanciáu, deportes tradicionales, tasties guiaes, concursos de sidra casera sobre madera, talleres d’ellaboración, conciertos y munches otres actividaes.
