Va tener llugar güei, martes 23 d’avientu, a les 13:30 hores, nel Salón de Plenos del Ayuntamientu Villaviciosa.
LA SIDRA.- Alejandro Vega, alcalde de Villaviciosa, va presentar a los medios de comunicación l’alcuerdu pol que’l conceyu de Villaviciosa s’incorpora a la Rede Europea de Ciudaes de la Sidre (RECS – Cider Cities), nun actu nel que tamién participarán Álvaro Alonso y Marcos Abel Fernández, miembros fundadores de Cider Cities y de la so xunta directiva actual, en representación de la Cámara Comerciu de Xixón y de la Fundación Asturies XXI, respeutivamente.
La Rede Europea de Ciudaes de la Sidre ye una iniciativa de cooperación internacional que xunce conceyos de distintos países de la Xunión Europea venceyaos histórica, cultural y económicamente a la sidre y a la mazana. La rede enmárcase nel proyeutu européu CIDEREU (Cider Cities), impulsáu col oxetivu de fortalecer la collaboración ente gobiernos llocales, entidaes culturales y axentes económicos del sector sidreru.
Cider Cities funciona como una ferramienta estratéxica pa facilitar la inserción internacional de los gobiernos llocales, promoviendo la cooperación descentralizada, l’intercambiu de conocimientu, bones práutiques y esperiencies n’ámbitos como la cultura sidrera, el padremuñu inmaterial, el desendolcu rural, el turismu sostenible, la economía llocal y la innovación venceyada a la mazana y la sidre.
La incorporación de Villaviciosa a esta rede europea supón un reconocimientu al so papel históricu como territoriu sidreru y mazanera de referencia y abre nueves oportunidaes de collaboración con otres ciudaes europees, favoreciendo la proyección esterior del conceyu y l’accesu a proyeutos compartíos, programes europeos y redes de trabayu estables.
Mientres la comparecencia van detallase los oxetivos del alcuerdu, l’algame de la participación de Villaviciosa na rede y les llinies de trabayu futures nel marcu de Cider Cities / CIDEREU.
