La CiderCon 2026, el principal alcuentru profesional del sector sidreru a nivel mundial, preslló ayeri les sos puertes en Providence (Rhode Island) tres dellos díes d’intensa actividá, con una asistencia de más de 400 persones y llagareros procedentes de tolos Estaos Xuníos y representación internacional. Dende l’entamu Asturies tuvo presencia gracies a la participación de la corresponsal de la revista LA SIDRA, Llucía Fernández, que cubrió l’eventu y llevó la cultura sidrera asturiana a un de los foros clave del sector.
La edición de 2026 cuntó cola avezada participación de productores norteamericanos, dende la Costa Este hasta’l Mediu Oeste y la Costa Oeste, destacando amás la fuerte representación de los Países Bálticos, que confirmaron el puxu sidreru d’esta rexón europea, cada vez más influyente nos alderiques técnicos y culturales alredor de la sidra contemporánea.
A lo llargo de la CiderCon desendolcáronse talleres, charres especializaes, tasties y espacios d’alcuentru profesional onde s’analizaron los retos del sector, la evolución de los estilos, la caltenibilidá productiva y les estratexes de collaboración internacional.
Llucía Fernández asistió a talleres, alderiques y actos profesionales, dando a conocer siempres que tuvo ocasión la sidra asturiana como cultura viva, amás de promocionar el SISGA como espaciu internacional de referencia y el Conceyu de Xixón como destín turísticu y ciudá comprometida cola sidra y la so proyección esterior. Esta llabor divulgativa permitió abrir conversaciones y contactos con profesionales y organizaciones del sector sidreru norteamericanu.
Nel marcu de la CiderCon, la corresponsal de LA SIDRA caltuvo amás dellos aconceyamientos cola cúpula de la American Cider Association (ACA), asina como con miembros d’asociaciones de llagareros de Nueva York y Michigan, con mires a establecer futures collaboraciones nel ámbitu de Cider Cities y otros proyectos d’intercambiu cultural y profesional. Al rematar l’eventu, la unviada de LA SIDRA declarábase satisfecha de les xestiones desendolcaes nel marcu de la CiderCon 2026, destacando la bona receptividá ya’l fondu interés pola la sidra asturiana y les oportunidaes abiertes pa reforzar la so presencia internacional “lo que ye vraeramente llamentable ye la falta d’una representación de los llagares asturianos equí”, resaltó, afirmando que la presencia de sidre asturiana ye una demanda xeneralizada pente’l públicu estauxuniénse.
El preslle de la CiderCon 2026 confirma’l momentu de madurez y espansión de la sidra a nivel mundial y reafirma la importancia d’estos alcuentros pa tender pontes ente territorios. Dende Providence, Asturies volvió demostrar que quier tar presente nos espacios onde se decide’l futuru de la sidra, aportando cultura, esperiencia y voluntá de collaboración internacional.
