Una iniciativa impulsada pola asociación El Culete Moyáu y col sofitu del Conceyu Xixón qu’aspira a dar visibilidá y puxu a la sidre fecho pa en casa
LA SIDRA.- Xixón va convertise esti mes d’agostu de 2025 en escenariu d’una iniciativa que fa historia: la primer edición oficial d’un Concursu de Sidre Casero que naz pa poner en valor la tradición sidrera doméstica, mui viva en munches parroquies del conceyu.
L’asociación El Culete Moyáu, aniciada va pocu, pero especialmente activa, ye la entidá que promueve esti certame, que cuenta col sofitu istitucional del Ayuntamientu de Xixón. El concursu formará parte de les actividaes de la Fiesta de la Sidra Natural, que se cellebra tolos años ente’l 22 y el 31 d’agostu. Concretamente, el concursu y la preba pública de la sidre casero tendrá llugar la mañana del vienres 29 d’agostu na Plaza Mayor de Xixón
Una tradición viva nos barrios y parroquies xixoneses
La sidre casero, fecho con mazana propio o de vecinos, ye una tradición bien arrayada en parroquies como Caldones, Santuriu, Fano, L’Abadía Cenero o Tremañes. Con esti concursu, el Conceyu Xixón quier reconocer l’esfuerciu de los pequeños ellaboraores y dar a conocer al públicu la calidá d’estes sidres que, davezu, nun lleguen al circuitu comercial.
El concursu incluirá una tastia a ciegues con un xuráu profesional, premios que tendrán en cuenta’l saborgu, arume, espalme… y servirán como fase previa pa la clasificación pal concursu Meyor Sidre Casero d’Asturies.
Proyeición cultural
El certame llega nuna dómina d’espardimientu y reconocencia de la cultura sidrera asturiana, dempués de la declaración de la Cultura Sidrera Asturiana como Padremuñu Cultural Inmaterial de la Humanidá pola UNESCO. L’echáu de sidre, la manera de faela, los llagares y les fiestes son parte d’un padremuñu que se moderniza ensin perder la so identidá.
Con esta primer edición, Xixón da un pasu alantre pa convertir la so tradición casera nun elementu más del so calendariu festivu y cultural.
