La Escuela de Sumillería de Sidra de la Fundación Asturies XXI celebró na Finca El Duque el primer Taller de Sumillería de Sidra, col envís de que los titulaos del Cursu Básicu de Sumiller de Sidra impartíu pola escuela afondaren nos conocimientos adquirios y los punxeren en práutica.
LA SIDRA.- El taller, que poles sos característiques y pa garantizar el so aprovechamientu, tuvo llendáu a un númberu másimu de 15 places, de les que la mayoría foron ocupaes polos recién titulaos sumilleres, estremóse en tres partes bien diferenciaes, entamando por un interesantísimu taller gustativu nel que los participantes, distribuyios en meses separtaes cola fin de que nun se dexaren influenciar poles opiniones del restu, foron clasificando saborgos, baxo la guía del profesor del CIFP d’Hostelería Juan Luis García. Asina, tres d’una breve introducción teórica, los asistentes recibieron vasos d’agua saborguizada que tuvieron d’agrupar por saborgos –dolce, ácido, amargo- y dientro de cada saborgu, ordenar por intensidá del mesmu.
Una bones practicao con agua, féxose lo mesmo con sidre, teniendo d’estremar el tastu predominante en dellos culinos que se foron sirviendo de dos en dos, ordenándose tamién los mesmos por más o menos intensidá. Esta parte tuvo la so dificultá, puesto que la sidre ye una bebida complexa y en cauna d’elles podía detectase, aparte del saborgu predominante, los otros, en menor intensidá, un auténticu retu pal paladar col que los asistentes practicaron conceutos adquirios nel cursu. Finalmente, tres de la puesta en común de los matices alcontraos nes sidres, prebóse tamién una sidre aframbuesao, pa ser quien a reconocer esi defectu.
La segunda parte del taller foi más teórica, cola esposición d’un perinteresante puntu de vista sobre la sidre y l’alcool por parte del Dr. Marcos Abel Fernández, quien destacó les cualidaes de la mesma comu alimentu y les sos virtudes melecinales –ensin negar por ello los sos aspeutos más perxudiciales-, destacando que ye la única bébora, xunto cola combucha en muncho menor medía, que tien propiedaes probiótiques y prebiótiques, colos beneficios qu’ello tien pa la salú.
Fizo notar amás el diferente tratu que se da socialmente a la sidre y otros alcooles, trataos xenericamente comu drogues con un cariz mui negativu ya incluso asociaciones dedicaes a frenar el so consumu, frente a la permisividá y fasta sofitu col que se trata el muncho más peligrosu y adictivu consumu de sicofármacos, nos qu’Asturies ye cabezalera n’Europa nel so consumu. “El sistema nun quier que la xente tea en chigre tomando sidre, falando, compartiendo y quiciás decidiendo lluchar polos sos drechos o por meyores condiciones de trabayu; prefiernos viendo Netflix con un lorazepán pa dir pa la cama y al día viniente a trabayar otra vuelta” remarcó, destacando les virtudes ansiolítiques y socializadores de la sidre.
Pa rematar el taller tuvo llugar la intervención de Faustino Vázquez, del llagar Panizales, quien presentó la so sidre Olivia, única nes sos carauterístiques por mezclar, nuna proporción de 60 a 40, sidre de xelu con sidre de fueu, dando llugar a una bébora espectacular, rica en matices y d’una intensidá esquisita, perfecha pa que los asistentes practicaren el paladar, buscando nella toques a frutes de güesu, ácidez, dolzor, ñicios de mazana y munchos más detalles que creen el complexu equilibriu que carauteriza Olivia, una sidre gourmet que namás pue alcontrase en Coalla o nel mesmu llagar que la ellabora. La preba derivó nun interesante alderique sobre la situación actual de la sidre, la diferencia pente’l sofitu que se da a la producción y comercialización de la sidre n’Asturies y, por casu, el País Vascu ya’l futuru de la nuesa bébora patria.
El taller finó con una visita a la zona de llagar de El Duque, onde se prebó la sidre ellaborada allí.
