Esti certame, organizáu pola Fundación Asturies XXI, ye ún de los concursos sidreros más importantes del país. Ye, amás, l’únicu que valora la sidre sobre la madre, ello ye, ensin trasegar
Dientro los actos previos del certame de la XVI Primer Sidre l’Añu, la gran espicha que l’añu pasáu axuntó a más de 10.000 persones adultes nel recintu ferial Luis Adaro y qu’esti añu va cellebrase nel mesmu sitiu ente’l 2 y el 5 d’abril, va tener llugar el concursu a la Meyor Primer Sidre l’Añu, qu’escueye la sidre que presenta les meyores característiques organoléptiques nestes primeres feches del añu, colos toneles recién abiertos.
La decisión del xuráu encargáu d’escoyer la Meyor Primer Sidre l’Añu 2026 desendolcaráse en dos fases.
La primer eliminatoria d’esta edición del concursu celebraráse en cata a ciegues abierta al públicu na Sidrería La Montera Picona de Ramón, el sábadu 21 a les 12:00 hores. Nella, el xuráu escoyerá les cinco meyores sidres presentaes.
Les cinco sidres seleccionaes pasarán a la fase final, que tendrá llugar el miércoles 25 a les 18:00 hores, tamién na Sidrería La Montera Picona de Ramón, onde se dará a conocer la sidre ganadora, que pasará a ser la sidre oficial de la XVI Primer Sidre l’Añu. Como ye tradición, van adquirise 1.000 euros en sidre del llagar ganador pa ponela a disposición de los asistentes a lo que, ensin dulda, ye la mayor espicha del país, l’eventu que marca l’entamu de la temporada sidrera y que se celebrará ente’l 2 y el 5 d’abril.
L’asistencia a les tasties del xuráu ye abierta al públicu en dambes xornaes. Amás, una vegada rematáu’l concursu y conocida la sidre ganadora, el públicu asistente podrá probar les sidres presentaes, col oxetivu de conoceles y valorales de primer mano.
Sidre sobre la madre
Dende va años, LA SIDRA y la Fundación Asturies XXI trabayen pola recuperación de la sidre ensin trasegar, un tipu de sidre que prácticamente desapaeciera del mercáu pola industrialización de los llagares y pola aplicación xeneralizada de los trasiegos. Cada vez son más los llagares que s’animen a comercializar esti tipu de sidre y a participar nesti certame.
