La XXXIV edición de la Fiesta de la Sidra Natural de Xixón baxó’l telón esti domingu con récord de participación y una ganadora: la sidra con Denominación d’Orixe Protexida del llagar Cabueñes, que s’alzó col Premiu Elogiu d’Oru al meyor palu sirvíu.
LA SIDRA – L’anunciu del resultáu fíxose na Plaza Mayor, entantu se cellebraba, nella y na Plaza’l Marqués, la tradicional preba abierta de los llagares xixoneses, ufriendo a los miles d’asistentescerca de 200 caxes de sidre coles que poner el ramu a diez díes nos que la sidre foi la protagonista esclusiva del calendariu braniegu xixonés.
Inagurando la xornada entregárase’l Tonel d’Oru a Luis Benito García Álvarez, profesor d’Hestoria Contemporánea de la Universidá d’Uviéu y director de la Cátedra de la Sidra, reconocíu pol so llabor como impulsor de la candidatura de la cultura sidrera asturiana a Padremuñu Inmaterial de la Humanidá pola UNESCO. García Álvarez calificó’l galardón como “un orgullu fondu, pero tamién un compromisu pa siguir trabayando con rigor científicu y amor pola nuesa cultura”.
El procesu de selección de la meyor sidre de la Fiesta arrancara’l 28 d’agostu, con una primera criba ente los llagares participantes, de la que salieron ocho finalistes. Sobre ellos deliberó’l xuráu na xornada final, con un resultáu axustáu y dellos empates que, finalmente y con un marxen axustáu, resolviéronse a favor de Sidra Cabueñes. La notaria Montserrat Martínez dio fe del premiu alredor de les 13.00 hores, que se desveló públicamente de la man del conceyal de Festejos xixonés, Jesús Martínez Salvador.
El representante del llagar, Diego Agüera, recoyó la placa diseñada pol artista Pablo Maojo y resumió con humor el secretu del ésitu: “mazana asturiana, munchu trabayu y muncho insomniu”.
La xornada incluyó tamién la entrega del premiu Sidrastur a la Etiqueta Más Guapina, que nesta ocasión foi pa Sidra Trabanco, en homenaxe al so centenariu.
L’actu final de la Fiesta de la Sidra cuntó cola música de la Banda de Gaites Noega y col arte del echador campeón Wilkin Aquiles, encargáu de sirvir los culinos al xuráu.L’ambiente sidreru siguió hasta pasáes les tres de la tarde, poniendo fin a una edición que confirma la cita xixonesa como referencia imprescindible del calendariu festivo-sidreru asturianu.
