Valverán inscribe toles sos pumaraes n’ecolóxicu

Nes 40 hectáries de la finca asturiana El Rebollar, en Sariegu, la pumarada dispon d’una planta potabilizadora cola que lleva a cabu la filtración y purificación del augua pal so posterior usu nos llabores propios del llagar; y controla les poblaciones d’inseutos cola instalación de 440 caxes nial, que favorecen la presencia d’aves inseutívores

LA SIDRA.- Masaveu Bodegas inscribió n’ecolóxico les 40 hectáries llantaes na Finca El Rebollar, en Sariegu (Asturies), llugar onde s’ellabora la sidre de xelu Valverán 20 Manzanas. Na pumarada xorrecen 20.000 pumares de once races estremaes (Blanquina, Xuanina, Regona, Raxao, Fuentes, Collaos, De la Riega, Verdialona, Perico, Durona de Tresali y San Roqueña), coles que Valverán ellabora añalmente anguañu 20.000 botelles d’esta distinguida sidre de xelu.

Esti camín escontra l’agricultura ecolóxica de la Finca El Rebollar ta en llínia cola filosofía catenible que define a tol grupu bodegueru, y que pasa por dar puxu a la biodiversidá, l’aprovechamientu del augua natural, el desendolcu de cubierta vexetal o’l tratamientu d’augües residuales.

Nesti sen, Valverán vieno desendolcando nos postreros años un apueste claru pola caltenibilidá, gracies a l’esaniciu d’adobos químicos, inseuticides, funxicides y herbicíes, lo que-y permitió recuperar l’augua proveniente de los sos propios pozos y utilizalo para riego y consumu humanu.

Dispón, amás, d’una planta potabilizadora cola que lleva a cabu la filtración y purificación de l’augua pal so posterior usu nos llabores propios del llagar, y una Estación Depuradora d’Augües Residuales (EDAR) pa tratar les augües residuales procedentes del llagar. Valverán trabaya tamién nun proyeutu empobináu a vertir les augües yá trataes afechiscamente a la rede de saneamientu xeneral del conceyu Sariegu y, d’esta miente, consiguir qu’eses augües yá trataes pasen tamién pola depuradora de Siero.

Control natural de la población d’inseutos
Nel so enfotu por dar puxu a la biodiversidá y la presencia de avifauna nes sos pumaraes -refugando cualquier usu d’inseuticides- Valverán instaló 440 niales o caxes nial. Cuarenta d’ellos pa rapaces nuecherniegues, 800 comederos y 120 talayes o perches d’aves rapaces pa favorecer la presencia d’aves inseutívores (carboneros, ferrerinos, mirlos, raitanes, etc.) y, d’esta miente, controlar les poblaciones d’inseutos ensin l’emplegu de productos insecticides. Amás, ta dándose puxu al desendolcu de sebes naturales nel zarru perimetral de la finca.

En tola finca desendólcase una cubierta vexetal natural, que’l so caltenimientu faise namás por aciu llabores mecánicos de roza pa salvaguardar el correchu xorrecimientu de pumares y l’afayaíza evolución propia de la biodiversidá.

Toles actuaciones tán empobinaes a protexer la biodioversidad de les parceles desendolcando una agricultura integrada que curie y respete’l mediu ambiente.