El prau Salcéu tornará convertise’l 10 d’agostu nel escenariu d’una de les fiestes de prau más afayaíces d’Asturies. La Confradería del Xiringüelu presenta un programa con actividaes pa toles edaes y un enclín ca vegada más sostenible.
LA SIDRA.- Pravia ya s’apaez pa vivir una nueva edición del Xiringüelu, la romería que dende va más d’un sieglu xunta a miles de persones al rodiu la sidre, los bollos preñaos y la música nel prau Salcéu. La cita grande sedrá’l domingu 10 d’agostu, pero les cellebraciones entamarán yá dende’l xueves anterior, con un programa completu qu’abarca dende actividaes infantiles fasta conciertos y concursos de casetes.
Esti 2025, la organización —a cargu de la Confradería del Xiringüelu, col sofitu del Ayuntamientu de Pravia— propón un modelu de romería más curiada y con mayor control del accesu, ensin perder l’ambiente festivu que carauterizó siempres a esta cita.
Xirinfantil, Popinazu y casetes: tradición y modernidá mano a mano
Les cellebraciones entamarán el xueves 7 d’agostu col llamáu Xirinfantil, una propuesta pensada pa la reciella que ca vegada gana más protagonismu nes fiestes populares. El vienres sedrá’l turnu del pregón y el tradicional Popinazu, con proclamación de la meyor caseta, entrega de premios y actuación de charangues y bandes.
El prau Salcéu cuntará, como davezu, con dos zones bien diferenciaes: la zona de peñes, con casetes montaes polos grupos asistentes y accesu llibre; y la conocía como XirinZone, un espaciu pensáu pal públicu más mozu, con ambiente musical continuu y accesu con pulsera previa.
Entraes y precios pa la XirinZone
Les entraes pa la XirinZone —únicu espaciu de pagu del Xiringüelu— van dende los 4 euros si se merquen previamente, fasta los 6 euros si se mercen el mesmu día del eventu na taquilla. Puen mercase online y ye obligao validar la entrada pa recoyer la pulsera.
Un modelu que se profesionaliza ensin perder raigañu popular
La organización del Xiringüelu vien apostando nos años caberos por profesionalizar l’eventu, calteniendo la esencia d’una romería popular pero garantizando la seguranza, el serviciu llimpieza y el control del aforu. L’horariu del recintu marcará l’apertura a les 11:00 hores y el preslle a les 23:00 hores..
Una fiesta que suma tradición y futuru
El Xiringüelu ye munchu más que una folixa de prau. Ye un símbolu d’identidá colleutiva pa xeneraciones de pravianes y pravianos, pero tamién pa centenares de mozos y moces de tol país qu’escueyen esti prau a la vera’l Nalón pa cellebrar l’asturianía al traviés de la sidre, la música y la convivencia.
La fiesta, que yá se vivió con gran participación en 2024, espera superar los 30.000 asistentes nesta nueva edición, y sigue postulándose como una de les grandes romeríes del calendariu asturianu. Pa munchos, ye’l so día favoritu del branu.
