Xornada de Sumilleres nel SISGA’18

Una vuelta finada la xornada de Tastia Abierta na que’l públicu podrá afondar na conocencia de les sidres de copa, al otru díi tocará’l turnu a los profesionales del seutor. Enólogos, mayestros bodegueros, xefs y prensa especializao que daránse cita nel restorán El Duque, rexentáu pola familia Baldó en Castiello Bernueces, Xixón.

Dicha empresa, especializada na rialización d’estremaos eventos, foi reconocía en numberoses ocasiones tanto poles sos istalaciones como pola profesionalidá del so presonal de cocina y sala. De fechu, en setiembre del añu pasáu recibió’l Premiu Nacional de Restauración Medalla d’Oru, otorgáu pola Rial Confradería de los Platos d’Oru.

Hai de destacar que la xornada de sumilleres ye una esperiencia de deprendizaxe continu, non solo en cuantes a procesos d’ellaboración se refier, sinonque tamién ye’l momentu nel que los protagonistes del SISGA’18 tienen la posibilidá –como sucediere n’ediciones pasaes- de fortalecer llazos y xenerar sinerxes pa dar puxu a los sos productos.

La tastia, de calter téunicu, rialízase de manera interactivo. Ca llagareru presenta estremaes sidres y va desplicando tolo rellacionao cola so ellaboración, produición, medios de distribuición, posibilidaes de mercáu, comercialización, aiciones de publicidá, de marketing y recepción ente’l públicu.

Amás, los ellaboraores tamién despliquen cómo s’alcuentra’l seutor sidreru en ca país o territoriu, los principales problemes colos que s’alcontró p’algamar el productu y les posibilidaes de medrar el so consumu y per ende les sos ventes.

Demientres la tastia degústase l’ampliu abanícu de sidre presentao nel Salón Internacional de les Sidres de Gala: sidre brut, de nueva espresión, esplumoses, les que se presenten en formatu botellín, llicores de sidre o mazana, auguardientes, les que tan ellaboraes con otros frutos, o, por exemplu, la sidre de xelu, que ta llegando a posicionase como ún de los productos gourmet más interesantes de los años caberos y nel que varios llagares asturianos cunten yá fasta con más d’una década d’esperiencia.

Pa poner el ramu, la xornada de sumilleres finará con un pinchéu de confraternización n’onde degustaránse estremaes muestres de la cocina asturiana tresnaos colos productos que da esta tierra pa tolos profesionales qu’acudan a la cita

VIII SALÓN INTERNACIONAL DE LES SIDRES DE GALA -SISGA’18-

VER ARTÍCULU LA SIDRA / PREMIOS SISGA’17 / VER SEMEYES DEL SISGA’17