El Conseyu de Padremuñu Hestóricu Español escoyó la candidatura d’Asturies frente a la d’otres Comunidaes Autónomes pa unviar al muerganismu internacional, l’espediente presentaráse en marzu de 2022 y la decisión pue entardar más d’un añu

LA SIDRA.- La cultura sidrera asturiana va ser la candidata que va presentar el territoriu español en marzu de 2022 énte la Unesco pa la so inclusión na Llista Representativa del Padremunu Mundial Inmaterial. El Conseyu de Padremuñu Hestóricu Español tomó ayeri esa decisión, a propuesta de la Conseyería de Cultura, Política Llingüística y Turismu d’Asturies, na so xunta semestral, cellebrada en Menorca.

“La incluxón de la cultura sidrera na llista de padremuñu inmaterial reforzaría’l sentimientu d’estima que la comunidá siente escontra’l so productu más identitariu” siñaló la conseyería. Indicó amás que contribuyiría de manera decisiva” a espublizar el respetu por unes práutiques y tradiciones qu’otorguen sostenibilidá al mundiu rural autóctonu. “La reconocencia tamién aidaría a revitalizar les actividaes agraries amestaes a la produición de la bébora y a dinamizar el sector, amás de dar puxu  a les actividaes turístiques y hosteleres” amestó.

Hai de destacar qu’esti mediu de comunicación foi reconocíu como ún de los “Embaxadores de la cultura sidrera asturiana” nel 2018, collaborando n’estremaes aiciones pa la xustificación del espediente que s’unvió al Conseyu de Padremuñu.

Como se señaló, la candidatura va presentase en marzu de 2022 énte la Unesco y, de magar entós, va abrise un procesu d’evaluación per parte del altu muerganismu internacional que va durar daqué más d’un añu. Amás, la conseyería tamién va poner en marcha a finales d’añu una campaña sobro’l llésicu venceyáu a la cultura sidrera, carauterizáu por términos inequívocamente asturianos. Dientru d’esa iniciativa, destaca l’homenaxe del dibuxante Ernesto García del Castillo, Neto, al popular cartelu ¿Qué tien la sidre?, rializáu fai más de 40 años por Elías Antonio Garrido Barrientos (1933-2019), conocíu como Garrido. El tributu consiste na actualización de la popular illustración-