“Na situación que tamos nun pue siguise. Nun pue ser que la mazana quede ensin pañar, que se pague a 30 cts, que se traiga de fora”
LA SIDRA.- Pepe Riestra ye un apasionáu de los pumares, dedicó la so vida a saber too sobro esi árbol y quier compartilo. amás, analiza con claridá la situación de la mazana n’Asturies y señala erros que se tán cometiendo. Falar con elli ye inspirador y revelador a un tiempu.
Nun basta con tener un terrén y llantar manzanales pa ser pumarero ¿De quién deprendiesti?
Ye una llarga hestoria. En casa del mio güelu paternu, n’Aramil, Siero, había una pumarada; non solo pumarada, toa triba d’árboles frutales, y el mio pae yera l’encargáu d’atendela. Elli siempres foi bien interesáu y bien estudiosu al que-y prestaba enforma tresmitir tolo que sabía. Eso heredelo yo d’elli.
Pela zona llamábalu la xente pa dir a podar, a ensertar… y siempres me llevaba con elli, por que deprendiera yo tamién ¿Qué tendría? Siete años, ocho… diba de la mano d’elli, faite una idea. Si lo que sabes nun lo enseñes a los demás, dicía, nun val pa ná, lléveslo tu a la tumba.
Yo del mio pa deprendí bien de coses; depués llega la mocedá y vas alloñando un poco de toes estes coses, pero nel momentu que decidimos la mio muyer y yo mercamos un terrén pa una casa, lo primero que fiximos foi llantar una pumarada. Aidóme muncho Claudio, de Piensos Biona, que yera un gran entendíu en pumares.
