L’Asociación de Sidra Asturiana -ASSA-, que tien la patente de la botella ‘Molde Fierru’ dirixóse al fabricante de botelles -Verallia Spain- pa ‘recorda-yos’ que namás puen vender esa botella a ASSA o a quien esta autorice
LA SIDRA.- Tal como se tarrecía, el conflictu pola patente de la botella tradicional asturiana de sidre -que llogró pa sigo ASSA-, ta xenerando toa una serie de tensiones nel sector sidreru asturianu, precisamente nunos momentos nos que la declaración pola UNESCO de la Cultura Asturiana de la Sidre como Padremuñuu Inmaterial de la Humanidá, tuviera de ser un motivu pa la xunión del sector.
Nesta ocasión, el Departamentu de Servicios Xurídicos d’ASSA dirixióse a Verallia Spain SA por que s’abstenga de vender la citada botella a “cualesquier persona ensin autorizar por ASSA”, lo qu’amás de ser llegalmente duldosu -la producción y vienta de la botella ye independiente del so usu, que ye lo que protexe la patente- pue suponer que los llagares asturianos ensin acomuñar nun puedan disponer d’ella -magar que ASSA siempres manifestó que permitiríe’l so usu a los llagares asturianos- pero sí los llagares de cualquier puntu del mundiu a quien ellos autoricen.
A la fin, va salimos caro la pasividá y el desenfotu del ‘Principado’ que ye quien realmente tuviera d’haber litigado pola patente, al tratase de patrimoniu asturianu, y ponela a dimposición de tolos llagares del país.
Por ello ye urxente y necesario pa evitar mayores entueyos, que la botella ‘Molde Fierru’ seya declarada d’interés públicu y una vegada desquitáu económicamente nos sos derechos a l’actual propietaria de dicha marca -ASSA- el so usu seya puestu a dimposición del conxuntu de la sociedá asturiana.
