La Casa Paquet, sede de Turismu del Conceyu de Xixón, acoyó la presentación de la 15 edición del Salón Internacional de les Sidres de Gala (SISGA), el mayor eventu internacional de sidres d’Asturies y ún de los más relevantes d’Europa que va cellebrase’n Xixón del 25 al 28 de setiembre.
Como novedá, esti añu va entregase un val pa una degustación nel SISGA col mercáu d’entrades d’AGROPEC.
LA SIDRA – L’actu abrióse cola intervención de Daniel Martínez, direutor de Visita Gijón/Xixón, entidá collaboradora del eventu. Martínez destacó la importancia de la sidra como parte esencial del mou de vida asturianu y como emblema identitariu: “La sidra forma parte esencial de la nuesa forma de vivir, de rellacionanos; ye ún de los grandes emblemes d’Asturies y queremos esportala al mundu. El SISGA ye una oportunidá maravillosa pa ello. Esti eventu ye tamién turismu n’estáu puru”. Nesa mesma llinia, sorayó’l papel de la sidra como motor turísticu, cultural y patrimonial de Xixón y d’Asturies, destacando la función del SISGA como escaparate internacional que contribúi a consolidar el destín como referencia pal turismu gastronómicu, cultural y de negocios.
Dempués tomó la pallabra Álvaro Ordás, en representación de la Cámara de Comerciu, quien esplicó que, como organización de calter empresarial, el so sofitu ye doble: per una parte, vinculando l’eventu al calendariu nacional del campu y l’agricultura al traviés d’Agropec, y per otra, nel so papel de presidencia de la rede CiderCities. Ordás anunció amás que cola compra de la entrada en taquilla pa Agropec va entregase un val pa una degustación d’una de les sidres participantes nel Salón.
Pela so parte, Antonio Migoya, de la Fundación Caja Rural de Xixón, destacó’l llargu percorríu del SISGA y recordó’l conceutu de “promoción inversa”, que consiste en traer inversores, autoridaes y empreses esternes a conocer lo que se fai n’Asturies. D’esta forma, el certame conviértese nun escaparate non solo de la sidra, sinón tamién de los productos gastronómicos y de la cultura asturiana en xeneral, pa que los visitantes puedan tresformase en embaxadores de lo nuesu nel mundu.
Más tarde intervino Manuel M. Busto, presidente del xuráu internacional que va valorar los 207 productos presentaos nesta edición, procedentes de 68 llagares de 18 países. Nel so discursu sorayó la contribución del certame al reconocimientu de la cultura sidrera como patrimoniu universal de la humanidá, desplicando que “en llugar de llindase a amosar vídeos y semeyes, el SISGA trai representantes de tolos países pa que puedan vivir en directo la cultura sidrera asturiana”. Destacó amás la vocación de permanencia del certame, en contraste con otros intentos esporádicos que nun llograron consolidase, y pidió mayor atención per parte de los medios de comunicación, señalando que non siempres se-y da al SISGA’l valor representativu que merez pa la industria alimentaria asturiana, que va muncho más allá de la sidra.
El turnu de pallabra zarrólu Marcos Abel Fernández Marqués, presidente de la Fundación Asturies XXI, quien recordó que “somos un pequeñu país a dos hores de Londres” y esplicó los oxetivos fundamentales del SISGA. El primeru ye conquistar pa la sidra espacios a los que la sidra tradicional nun llega, destacando la calidá de les diferentes ellaboraciones y armonizándoles con productos gastronómicos d’alta gama. El segundu ye resaltar el calter internacional de la sidra y la importancia de la interrellación ente los territorios productores a nivel cultural, gastronómicu y empresarial, aprovechando les posibilidaes de desenvolvimientu económicu y d’innovación que la sidra ufierta y nes que Asturies tien muncho que aportar. Fernández Marqués destacó tamién los valores que tien el SISGA: autenticidá, raigañu cultural, calidá, innovación dende la tradición, sociabilidá, caltenibilidá y la diversidá de les miles d’espresiones de la sidra, compartiendo conocimientos ente los distintos países participantes.
En cuanto a los Premios SISGA, recordó que son de los más prestigosos nel ámbitu internacional gracies a la peculiar composición del xuráu, que incluye a tolos llagareros concursantes, lo que homoxeneiza los criterios de calidá y ufierta una gran credibilidá. Recalcó que’l SISGA nun ye un congresu al usu, sinón un modelu que yá ta esportándose, como lo demuestra la recién cellebración del SISGA Japan en Tokio, organizáu pola Fundación en collaboración colos embaxadores del certame n’Xapón, y que congregó a más de 4.000 asistentes.
La cita principal pal públicu xeneral va celebrase’l sábadu 27 de setiembre nel Salón de Congresos de la Feria Internacional d’Amueses d’Asturies (FIDMA), con una esposición de productos que va permitir, por namás diez euros, degustar toles sidres presentaes y falar en directo con llagareros de tol mundu. El programa va zarrase col Brunch de Gala nel Llagar Finca El Duque, que va acoyer la entrega de los Premios SISGA, con renome internacional y garantía d’equanimidá gracies al sistema de xuráu internacional formáu polos propios elaboradores participantes.
