Entamu LA SIDRA d’Avientu (Nb. 260)

Entamu

Finamos esti añu sidreru cola sidre nuevo formientando en pipes y tinos, y con tantes y tan bones promeses feches polos nuesos políticos que too paez indicar que, por fin, va llantase cara a los problemes reinales del sector: la falta de mazana autóctono, la recuperación del consumu, la diversificación y meyora de la calidá de la sidre, el reconocimientu de la categoría d’echaor, l’aplicación de la llexislación no que cinca a lo que ye y lo que nun ye una sidrería, el fin de la especulación urbanístico y de la masificación turístico qu’acaba con tantes pumaraes, l’aculturización que llenda l’accesu de la mocedá asturiana a la sidre ya, inclusive, la presentación del inaplazable Plan Estratéxicu de la Mazana y la Sidre.

Dende llueu, a estes altures tamos más qu’avezaos a que mos regalen los oyíos con bones pallabres y pocos fechos, polo que’l nuesu escepticismu énte tan bones perspeutives ye bien grande.

Con dalguna salvedá —l’estand del Principáu na Feria Muestres d’Asturies, la consecución d’un espaciu físicu y d’un meyor presupuestu pa la Cátedra de la Sidre d’Asturies…— esti nun foi precisamente un añu de cumplimientos y, en dellos casos, como nel aniversariu del reconocimientu pola UNESCO de la Cultura Asturiana de la Sidre, la improvisación y el desenfotu fueron les principales carauterístiques.

En cualesquier casu, preferimos acabar l’añu creyendo nes promeses. O, meyor entá, sabiendo que l’interés y el compromisu de la sociedá asturiana pa cola so cultura sidrera lleva a los políticos que la representen a avanzar nesi sen. Dixéremoslo yá en dalguna ocasión: corren bonos tiempos pa la nuesa sidre y hai motivos pa ser optimistes.

Como siempres, tamién surde la anti-Asturies, los profetes del auto-odiu, los mesmos que se nieguen a la oficialidá de la nuesa llingua y a cualesquier tipu d’espresión de la identidá asturiana. Ehí tenemos a la Asociación Asturiana de Pediatría y a Rodríguez-Vigil, l’espresidente-Petromochu del Principáu, clamiando escontra la inclusión de la cultura sidrera asturiana nes escueles, falando d’educación pal alcolismu y d’adoctrinamientu… Los mesmos que ven estupendo que en La Rioja s’entame’l cursu escolar llevando al alumnáu a la vendimia, escandalícense porque se cellebren sidrocoles o amagüestos nos colexos asturianos. Tolo asturiano-yos molesta.

Nun tien mayor importancia: saben y sabemos que nun tienen un res que facer frente a una sociedá que apuesta claramente pola so identidá y pol so futuru. Y ehí tenemos faciéndose la sidre nuevo, una promesa que siempres se cumple.