El II Cursu de Sumillería de la Sidre enfortia’l papel del Panel de Tastia como exa de profesionalización del sector
LA SIDRA.- El II Cursu de Sumillería de la Sidre tien como oxetivu formar a los participantes na prescripción de sidre, apurriéndo-yos los conocimientos y ferramientes precisos pa la so correcha recomendación y serviciu. Asina mesmo, busca capacitalos pa participar na evaluación de sidres, seya como miembros de xuráu en concursos y tasties oficiales o como asesores y orientadores especializaos.
La Escuela de Sumillería de la Sidre pon en marcha la segunda edición d’un cursu avanzáu que da continuidá al trabayu entamáu’l pasáu añu y qu’apuesta decididamente pola escelencia formativa y la profesionalización del sector sidreru asturianu.
Entamáu pola Escuela de Sumillería de la Sidre —entidá con proyección y reconocimientu internacional, con titulaos qu’exercen como xuraos en certámenes y eventos especializaos—, el cursu entamará’l 19 marzu y va cellebrase nel CIFP de la Escuela d’Hostelería y Turismu de Xixón, gracies a un conveniu de collaboración ente la Fundación Asturies XXI y el propiu centru educativu.
Con una duración total de 25 hores, les sesiones tendrán llugar los xueves 19 y 26 de marzu; 9, 16, 23 y 30 d’abril; y 7, 14, 21 y 28 de mayu, en horariu de 18:00 a 20:30 hores. El númberu de places ye mui llindáu, lo que garantiza un siguimientu personalizáu y un trabayu práuticu rigurosu.
El Panel de Tastia, exa central del cursu
L’elementu vertebrador d’esta segunda edición ye’l Panel de Tastia de Sidre, concebíu como una ferramienta didáctica avanzada d’analís sensorial. Dirixíu por Juan Luis García, profesor del CIFP d’Hostelería y Turismu de Xixón, el panel desendólcase de mou continuáu a lo llargo de tol programa.Al traviés de tasties a cieges, muestres codificaes y fiches d’evaluación normalizaes, l’alumnáu entrena la so capacidá pa identificar arumes, saborgos, sensaciones visuales y olfatives, amás de deteutar posibles defeutos venceyaos a la ellaboración, conservación o serviciu de la sidre. L’oxetivu nun ye emitir valoraciones suxetives, sinón formar un criteriu téunicu, precisu y fundamentáu, dotando a los participantes d’un llinguaxe sensorial común y profesional.
Cada sesión inclúi una fas individual d’analís y una posterior puesta en común, de gran valor formativu, na que se contrasten percepciones, agfítense criterios y consolídase’l deprendizaxe colleutivu.
Un programa con profesionales de referencia
El trabayu práuticu del Panel de Tastia complétase con un programa teóricu especializáu, impartíu por profesionales de reconocíu prestixu venceyaos al mundiu de la sidre, la gastronomía y la investigación sensorial.
El cursu ábrese cola conferencia «Fundamentos de la Cultura Sidrera Asturiana», a cargu de Luis Benito García, direutor de la Cátedra de la Sidre de la Universidá d’Uviéu. La sumillería aplicada a la sidre y les sos diferencies respeuto al vinu van ser abordaes por Donato X. Villoria, espertu nel ámbitu sidreru.
La sidre de xelu va centrar una de les xornaes, impartida por Esteban Blasco, enólogu del Llagar Valverán, quien va analizar el so orixe, métodos d’ellaboración y perfil sensorial. El componente científicu va llegar de la mano del Dr. Marcos Abel Fernández, con una ponencia dedicada a los neuroreceptores y al funcionamientu del sistema sensorial na tastia.
La química y enóloga Cristina Castaño va ufiertar dos conferencies clave: una sobro terminoloxía enolóxica aplicada a la sidre y otra centrada en dieldos y procesos de formientación, afondando en tipos de dieldos, fases formientatives y arumes d’orixe formientativu. El bloque aromáticu complétase con dos sesiones impartíes pol sumiller Ricardo del Río, dedicaes a les families aromátiques, arumes positivos y defeutos.
El programa inclúi amás una conferencia sobro maridaxe con sidre, a cargu de Lluis Nel Estrada; un taller teóricu-práuticu d’escanciáu y serviciu impartíu por Laura Ovín, campeona echaora y miembru del xuráu del Campeonatu Oficial d’Echaores d’Asturies; asina como una visita téunica con tastia de sidre de xelu al Llagar Valverán. El cursu va zarrase con sesiones de repasu y evaluaciones teóriques y práutiques.
Places llendaes y criterios d’almisión
El II Cursu de Sumillería de la Sidre cuenta con namás 20 places, lo qu’enfortia’l so calter especializáu y l’enfoque práuticu del Panel de Tastia. Van tener prioridá quien realizaren el Cursu de Sumillería Básicu.
Les persones que nun dispongan d’esta formación previa van tener que presentar una esplicación motivada na que xustifiquen les razones poles que deseyen realizar el cursu. Esta documentación va ser valorada pola organización pa determinar la so posible almisión.
El costu del cursu ye de 300 euros -en conceutu de donación, lo qu’implica beneficios fiscales- ya inclúi tanto la formación teórica como toles sesiones práutiques de tastia.
Un apueste pola escelencia sidrera
Con esta segunda edición, la Escuela de Sumillería de la Sidre de la Fundación Asturies XXI, en collaboración col CIFP d’Hostelería y Turismu de Xixón, consoliden una propuesta formativa d’altu nivel que sitúa l’analís sensorial y el Panel de Tastia nel centru del deprendizaxe.
Un cursu pensáu pa formar profesionales con criteriu, conocimientu téunicu y compromisu cultural, capaces de valorar, comunicar y dignificar la sidre asturiana dende la escelencia.
