Esti añu quedaron munches persones en llista d’espera. La organización nun descarta ampliar places o facer nueves versiones del Sidracrucis a lo llargo de l’añu.
La mañana entamó nel llocal de la Revista LA SIDRA, puntu de partida del Sidracrucis, onde los pelegrinos fueron llegando con tantes ganes que media hora enantes de la cita yá taba el llocal llenu de sidreros ávidos de culinos. Lo primero, por supuestu, el repasu a les normes, la repartida de camisetes, identificadores, un llibru sobre la Cultura Asturiana de la sidre –pa culturizase– y una llata de Sidra Guzmán, d’avituallamientu pa emerxencies.
L’ensayu musical del himnu oficial de la ocasión, el “Xermanín, échame un culete”, que se repitió per tolos chigres del percorríu, acompañáu poles primeres caxes de sidre, foi animando l’ambiente y, cuando se salió en procesión dirección a los primeros chigres, yá quedaba claro’l bon xeitu que diba reinar nesta edición del Sidracrucis.
La primer parte del percorríu penitente centróse, como ye avezao, nes sidreríes de Xixón, coles primeres paraes na Sidrería Chaflán, con sidre Castañón, y Casa Juan, con sidre Llagar de Quintana, onde se dexaron ver los primeros bailles y descubrimos que llevábemos una panderetera d’incógnitu ente los participantes, y la Montera Picona, onde’l so escepcional equipu d’echaores marcó el ritmu cola so avezada eficiencia sirviendo culinos de sidre Menéndez. Como ye d’esperar, acompañaos d’un arrogante pinchéu, que pa beber hai que forrar.
Tocaba descansar de chigres, asina que, tres una solemne procesión cola botella al llombu y siguiendo la gaita y panderetes, fuimos en bus a la Primer Sidre l’Añu, onde fuimos recibíos con vitores y onde recibimos el vasu oficial y la xinta, qu’acompañamos con abondosa sidre de los toneles y de la barra, mientres esfrutábamos del escelente ambiente del eventu.
A eso de les cuatro y media coyimos l’autobús camín d’Avilés, onde nos esperaba una prestosa visita a Sidra Germán, llar de la Meyor Primer Sidre l’Añu, onde los hermanos Germán y Marino nos enseñaron les sos instalaciones, desplicando tol procesu y resolviendo duldes, mientres probábamos la so sidre. Ensin alloñanos muncho, namás salir del llagar a la terraza de la Sidrería Casa Germán, esperábanos un xenerosu pinchéu y dos dispuestos echaores que nun dieron tregua a los penitentes sidreros.
La penúltima parada del Sidracrucis llevómos a Villalegre, al par de la estación de trenes, un llugar conocíu pola abondancia de chigres cuasi pegaos l’ún al otru, lo que facilitó muncho los desplazamientos d’un a otru, anque hai que reconocer que costaba sacar a la xente de cada chigre pa dir al siguiente. Yumay, con sidre El Gobernador y pinchéu; La Ruta, con sidre JR y pinchéu; y La Estación, cola mesma sidre y pinchéu.
Como comprenderéis, depués d’esto y con tolos bailles, cancios y demás, teníemos sede y fame, asina que punximos el ramu al Sidracrucis con una escelente espicha na Sidrería El Mallu d’Avilés, pesllando otra apoteósica xornada de Sidracrucis de la que naide va arrepentise.
Esperamos a los pelegrinos güei y mañana, como a toos vós, na Primer Sidre l’Añu, que’l cuerpu pide sidre. Recordái: nel recintu ferial Luis Adaro, güei cola actuación estelar de Rollu Folk.
