Entrega premios XXXI Campeonatu d’Asturies d’Echaores

El Muséu de la Sidra de Nava foi l’escenariu nel que tuvo llugar la entrega de los premios de la XXXI edición del Campeonatu d’Asturies d’Echaores, con Salvador Ondó nuevamente campeón

LA SIDRA Na xornada d’ayeri apurriéronse los premios del Campeonatu d’Asturies  d’Echaores 2024. Un eventu nel que se reconocieron a los diez primeros clasificaos d’esta postrer edición. Toos ellos recibieron diploma acreitativu y a los trés primeros un premiu n’efeutivu. Tamién se gallardonó a los trés meyores puntuaos de la categoría sub25, asina como a los trés meyores equipos de chigres, una de les novedaes d’esti postrer campeonatu.

Los ganaores d’esta edición fueron los siguientes:

1. Salvador Ondó (Tierra Astur)
2. Wilkin Aquiles (La Montera Picona de Ramón)
3. Jorge Vargas (La Montera Picona de Ramón)
4. Antonio Sorca (El Portal)
5. Reinaldo Belén (El Portal)
6. Jonathan Trabanco (Los Portales de Jaminón)
7. Amauris La Pauta (Tierra Astur)
8. Pelayo Rodríguez (La Montera Picona de Ramón)
9. Alexander Gabriel (Tierra Astur)
10. Isabella Padrón (Bodegues Anchón)

Categoría Sub-25

1. Amauris La Pauta (Tierra Astur)
2. Isabella Padrón (Bodegues Anchón)
3. Alexander Gabriel (Tierra Astur)

Meyor equipu d’echaores

1. La Montera Picona de Ramón (Xixón)
2. Sidrería Tierra Astur (Uviéu)
3. Sidrería El Portal (Villaviciosa)

Enantes de la entrega diplomes, les autoridaes presentes nel actu dirixieron unes pallabres al públicu asistente. “Pa nós ye una obligación moral sofitar esti campeonatu. La sidra d’Asturies y l’echáu de sidre son dos conceutos que van de la mano. Oxalá les sidreríes sigan apostando por echar sidre. A tolos que lo faen gustaríame felicitalos”, manifestó’l presidente del Conseyu Regulador de la DOP Sidre d’Asturies, Víctor Ramos.

El teniente alcalde de Nava, Jorge Ponte, tamién tuvo pallabres de gratitú haza los echaores. “Es nuestra responsabilidad poner en valor esta práctica”, manifestó. Pela so parte, el responsable de Mediu Rural de Caxa Rural d’Asturies, Javier Nievas, apostó por cultivar la tradición: “Ye una reafirmación de la nuesa identidá. La sidre y Asturies son indixebrables. Como asturianos tenemos de protexer esti productu, tan xuníu a la nuesa tierra”.

Marcelino Marcos, conseyeru de Mediu Rural y Política Agraria del Gobiernu de Asturies, foi l’encargáu de presllar les intervenciones. “L’echar sidre foi clave pa consiguir que la Cultura Sidrera Asturiana fuera estremada como Patrimoniu Inmaterial de la Humanidá pola Unesco. Un bon echaor siempres ye un embaxador de Asturies. Ye un padremuñu que tenemos de caltener y equí tenemos la suerte de cuntar con grandes profesionales”, comentó.

Enantes de rematar l’actu, Saúl Moru, presidente de l’Asociación d’Echaores y moderador del actu, desatapó que los doce primeros clasificaos d’esta postrer edición fueron convidaos a participar na Copa d’Echaores, un nuevu campeonatu que va ser televisáu na Televisión del Principáu d’Asturies (TPA) y que los sos detalles dirán desvelándose llueu.

VER SEMEYES DEL ACTU

Para recibir el PDF de la revista LA SIDRA hace falta estar dado de alta en el whatsapp de LA SIDRA. ¡Gratis!!