La sidre asturiano salta a la prensa internacional de la mano de The Times

La cultura sidrera asturiana crució fronteres y llegó a les páxines d’unu de los diarios más influyentes del mundu: The Times. El periódicu británicu vien d’espublizar una pieza dedicada al arte d’echar sidre na figura de Salvador Ondó, campeón d’esta téunica, que manifestó’l so esmolecimientu pol futuru d’esta tradición.

LA SIDRA.- Que The Times dedique espaciu a falar de la sidre d’Asturies ye un pasu importante pa la so visibilidá global. Non solo da a conocer la téunica d’echar sidre, sinón que tamién tresmite al públicu internacional el valor patrimonial y cultural d’una tradición que la UNESCO reconoció como Padremuñu Cultural Inmaterial de la Humanidá.

L’artículu, ensin embargo, refierse al echar sidre  como una Spanish tradition, una espresión que, anque pue ser entendible pa un lector de fuera, nun ye cierta. L’echar sidre, ye una espresión puramente asturiana, fondamente venceyada al paisaxe, la historia y la vida social d’Asturies. Reducilo a un conceutu xeneral español dilúi la so singularidá y tracamudia la so verdadera procedencia.

Esti matiz nun quita importancia al llogru que supón salir nes páxines d’un mediu con tanta proyeición. Ye una oportunidá d’oru pa reforzar la imaxe d’Asturies como tierrra de sidre y reivindicar la so especificidá cultural. Ca referencia internacional debería sirvir pa afitar un mensaxe bien nidio: l’echar sidre ye cultura asturiana con proyeción universal.

Amás, esta visibilidá pue abrir caminos pa un turismu cultural más cuidáu, que venga a conocer de primera mano’l mundiu de la sidre, los llagares, la sabiduría de los escanciadores y l’ambientu únicu que se vive nes espichas. Pa ello, la comunicación internacional tien qu’emplegar términos precisos y materiales bien cuidaos que tresmitan la autenticidá del nuesu patrimoniu.

Con casos como esti, queda claro que la cultura sidrera asturiana tien un potencial enorme fuera les sos llendes. Lo importante agora ye saber aprofitalu ensin perder la esencia, ensin amarutala baxo etiquetes xenerales, y asegurando que’l mundiu sepa que, cuando s’echa un culín y espalma la sidre en vasu, lo que ta viendo ye Asturies en puru estáu.