Llastres, vincúlase a la DOP Sidre d’Asturies

Trátase de la segunda llocalidá, que se compromete con esta marca de calidá

 LA SIDRA.- Los hosteleros de Llastres alcordaron col Conseyu Regulador de la DOP Sidre d’Asturies ufiertar los productos con Denominación d’Orixe Protexida como primer opción en sidre natural y esplumosa a quien visiten los sos establecimientos. D’esta miente, la villa colunguesa conviértese na segunda llocalidá, tres Tazones, que se compromete cola marca DOP Sidre d’Asturies.

Pa simbolizar esta alianza, esti xueves, una docena de propietarios d’establecimientos llastrinos, al pie de l’alcaldesa de Colunga, Sandra Cuesta, y el presidente del Conseyu Regulador, Guillermo Guisasola, citóse nel puertu esportivu de Llastres pa echar un culín de sidre y reflexar, asina, el so compromisu con esti productu ellaboráu con mazana 100% asturiana.

“Nós más que naide tenemos que mirar pol nuesu productu. Apostar pola DOP Sidre d’Asturies ye faelo polos pumareros, llagareros y productores asturianos. Creyemos que va ser un reclamu pa los turistes que vengan visitamos”, reconocíen los hosteleros. Pela so parte, Guillermo Guisasola amosóse bien satisfechu con esti alcuerdu. “Llastres ye un llugar de referencia n’Asturies, non solo no turístico, tamién no gastronómico. Por ello, tamos bien contentos de poder anunciar esta alianza. Oxalá se vaigan sumando otres llocalidaes a esta iniciativa”, comentó.