Un añu dempués del reconocimientu de la Cultura Asturiana de la Sidre como Padremuñu Cultural Inmaterial de la Humanidá pola UNESCO, la figura de Luis Benito García sigue siendo clave p’atalantar non namás cómo s’algamó esti fitu, sinón qué retos se planteguen d’equí p’allantre. Historiador, profesor titular de Historia Contemporánea na Universidá d’Uviéu y direutor de la Cátedra de la Sidre d’Asturies, Benito representa una manera d’afrontar la sidre que va muncho más allá del productu: como cultura viva, como sistema social y como padremuñu que tien de curiase con criteriu.
Na entrevista esppublizada nel númberu d’Avientu de LA SIDRA, Luis Benito fai balance d’esti primer añu tres la declaración de la UNESCO, un periodu intensu nel que la sidre ganó visibilidá y centralidá nel alderique públicu. La inclusión na llista representativa punxo’l focu sobro la sidre y xeneró un interés notable, con un calendariu continuu d’actos, reconocencies y actividaes venceyaes a esti nuevu estatus.
Sicasí, llueu del tonu cellebratoriu, apaez tamién una mirada crítica y fondera. Pa Luis Benito, el verdaderu retu entama agora: cómo xestionar un padremuñu vivu ensin banalizalu, cómo tresmitilu ensin convertilu nun decoráu turísticu y cómo evitar que la sidre quede atrapada na postal o nel folclorismu superficial. D’ehí la importancia de cuntar con ferramientes d’analís, investigación y educación que permitan siguir pensando la sidre dende la complexidá.
Nesti sen, la Cátedra de la Sidre xuega un papel clave. Definida por elli mesmu como la casa de l’alta cultura sidrera, esti espaciu académicu asumió, con medios llindaos, una xera ambiciosa: investigar, espublizar y xenerar conocimientu rigurosu sobro los ritos, los llugares, les pallabres, les formes de sociabilidá, el paisaxe o la memoria oral venceyaos a la sidre. Un trabayu qu’escomienza a dar frutos, sobromanera colos siete doctorandos qu’anguañu desendolquen investigaciones venceyaes a esti ámbitu.
La inauguración de la nueva sede de la Cátedra na Casona de La Buelga (Ciañu, Llangréu) supunxo un puntu d’inflexón nesa llínia. Un espaciu cargáu de memoria colleutiva, venceyáu a la historia social del Nalón, que permite abrir la universidá al territoriu y reforzar la dimensión pública del proyeutu, con xornaes, charres, actividaes formatives y procesos d’investigación abiertos a la ciudadanía.
Luis Benito nun esconde una cierta escepicismu frente a les promeses institucionales. Reconoz avances concretos —meyor presupuestu, espaciu físicu, dalgunes llinies d’ayuda— pero señala tamién la lentitú alministrativa y la falta de cumplimientos notros ámbitos. Con too, apunta a un factor clave: el compromisu de la sociedá cola cultura sidrera, que ye’l que, a la fin, emburria a les instituciones a avanzar.
Nel fondu, la so idega ye clara: cuanta más sidre se faiga con mazana d’Asturies, meyor pa toos; y cuanta más reflexión crítica, investigación y educación se xeneren alredior d’ella, más garantizáu va tar el so futuru. Pensar la sidre ye, tamién, pensamos como país. Y nesi procesu, la universidá, llueñe de tar alloñada de la vida cotidiana, tien muncho que dicir.
