La Primer Sidre l’Añu vuelve celebrar la llegada de la primavera como manda la tradición n’Asturies: con sidre, cultura y folixa
VER SEMEYES DE LA XV PRIMER SIDRE L’AÑU
El Pabellón Asturias del Recintu Ferial Luis Adaro (Feria de Muestres) y el so entornu van acoyer de nuevu esti eventu, con tolos espacios yá preparaos: barra, pipes, zona de xuegos tradicionales, parrilla, meses, escenariu y l’Espaciu UNESCO, destináu a tasties y degustaciones.
El funcionamientu del eventu, que espera aconceyar a miles de persones —l’añu pasáu la cifra averóse a les 10.000—, va ser asemeyáu al d’ediciones anteriores. Per aciu d’una pulsera con un costu de 10 euros, los asistentes van poder tastiar llibremente la sidre de les decenes de llagares participantes y acceder a toles actividaes programaes. Hai que recordar que tán pensaes pa toles edaes y qu’esisten numberoses propuestes pa visitar l’eventu en familia, con talleres y xuegos, amás de la popular mayada de sidre, ente otres munches.
La entrada va permitir, amás de prebar la sidre, participar en talleres d’echar sidre, esportes tradicionales, tasties guiaes, concursos de sidre casero fecho en maera, talleres d’ellaboración, pruebes gastronómiques y otres munches actividaes. Destaquen los conciertos diarios a les siete la tarde, les tasties guiaes de sidres y productos gastronómicos, l’amplia programación infantil, los concursos y los talleres d’echar sidre.
Hai que destacar el concursu de sidre casero fecho en maera, que se va cellebrar el domingu, presentáu por Odón del Paganéu, pal que se van recoyer amueses —seyes botelles— dende’l xueves fasta última hora del sábadu.
La inauguración va tener llugar mañana a les 13:00 hores col pregón, que esti añu va correr a cargu de la Plataforma Escontra la Contaminación de Xixón, integrando asina les reivindicaciones ciudadanes nel eventu.
De siguío van entregase los premios a la Meyor Primer Sidre l’Añu:
• Meyor PSLA y sidre oficial: Sidra Germán (Avilés)
• Segundu clasificáu: Sidra Contrueces (Xixón)
• Tercer clasificáu: Sidra La Morena (Viella, Siero)
L’actu va zarrase col primer culín, a cargu d’Alejandra Vanegas, y l’echáu colleutivu de sidre cola participación de la Bona Cofradía de los Siceratores d’Asturies.
Los horarios d’apertura del eventu van ser de 13:00 a 21:00 el xueves, de 12:00 a 21:00 el vienres y sábadu, y de 12:00 a 17:00 el domingu.
