Sidre y Universidá

La Universidá d’Uviéu vive d’espaldes a Asturies y eso afeuta tamién a la sidre, talo y como-y lo recordaron los empresarios asturianos al reutor.

LA SIDRA.- Na clausura de les xornaes “Creando talento”, entamáu pola Federación Asturiana d’Empresarios, Santiago Garcia, reutor de la Universidá d’Uviéu tevo qu’oyer series crítiques sobro’l papel de la Universidá na sociedá asturiana, y na so intervención aseguró que yera’l momentu de “repensar” les titulaciones que s’ufierten pa orientales más haza les necesidaes del texíu productivu del país.

Nesi sen, Pablo García, presidente de la patronal asturiana d’empreses de formación remembró que “l’añu pasáu hebio un certificáu profesional n’Asturies sobro como faer cerveza artesano, pero dengún sobro como ellaborar sidre”, confirmando una denuncia que venimos rializando periódicamente dende LA SIDRA.

L’ausencia a estes altures  na Universidá d’Asturies d’unos estudios y una titulación n’enoloxía resulta agora mesmo indesplicable, non solo porque esiste un seutor productivu que precisa d’esos profesionales, sinon y sobro tou porque la formación española n’enoloxía ta vinculada dafechu al vinu, y nin el pumar, la mazana o la sidre ocupen un espaciu mínimu nesos estudios, colo que los enólogos que s’incorporen al seutor sidreru lo que fain ye aplicar los sos conocimientos sobro’l vinu a la sidre, dándose tou un procesu de “vinificación” de la mesma.

Arriendes d’ello, y con vistes al necesariu lliderazgu nel tarrén internacional, una formación enolóxica centrada na sidre supondríe un referente internacional de primer grau, con repercusiones sociales y económiques perimportantes pa la Universidá d’Uviéu, pal seutor sideru y per ende pal nuesu país.