Una de sidre pa los cantantes

La Plaza de Requexu en Mieres del Camín sedrá l’escenariu del I Alcuentru Llibre de Cantares de Chigre.

LA SIDRA.- Los hosteleros  de Requexu en Mieres del Camín patrocinarán el I Alcuentru Libre de Cantares de Chigres. El so cordinador ye l’intérprete de tonada José Manuel García “A los participantes entregaráse-yos una botella sidre y un bollu preñáu. Hai concursos nos que s’entrega una botella vinu, pero pa nós, la tradición ye la sidre” siñala’l cantante y amiensta que ye una forma de caltener vivu’l vezu de canciar pelos chigres. El que quiera participar tien de llamar al númberu 630 506 363. Les places son llimitaes, namás 15 puestos que se cubrirán per estrictu orde d’iscripción y podrán rializase fasta’l 30 d’agostu.

Esti actu llevaráse a cabu’l prósimu 8 setiembre na Plaza de Requexu. L’horariu sedrá de cincu y media la tardi fasta les nueve la nuechi. Pa los intérpretes que lo soliciten pondráse a dimposición un gaiteru pa que los acompangue coles sos sintoníes. José Manuel García siñaló qu’esti certame ta abiertu a toles edaes y que nun se precisa ser profesional.

La xida pola que l’alcuentru se cellebra en díi festivu ye p’atrayer al másimu públicu posible y asina dar a conocer los cancios tradicionales asturianos. Y ye que comu dixere Xosé María García “Llában”, direutor de l’Amuesa Asturianada y Sidre que tien llugar na Primer Sidre l’Añu “Asturianada y sidre siempre tuvieron xuntos… dende los oríxenes. Nos chigres, nos llagares, siempre se bebía sidre y cantábase”.