LA SIDRA – Villaviciosa formalizó güei la so incorporación a la Rede Europea de Ciudaes de la Sidra, una iniciativa de cooperación internacional que xunce conceyos de distintos países de la Xunión Europea venceyaos histórica, cultural y económicamente a la sidre y a la mazana. La rede enmárcase nel proyeutu européu CIDEREU (Cider Cities), impulsáu col oxetivu de fortalecer la collaboración ente gobiernos llocales, entidaes culturales y axentes económicos del sector sidreru.
Cider Cities furrula como una ferramienta estratéxica pa facilitar la inserción internacional de los gobiernos llocales, promoviendo la cooperación descentralizada, l’intercambiu de conocimientu, bones práutiques y esperiencies n’ámbitos como la cultura sidrera, el padremuñu inmaterial, el desendolcu rural, el turismu sostenible, la economía llocal y la innovación venceyada a la mazana y la sidre.
Nel repasu institucional, el gobiernu llocal recordó que la relevancia del conceyu quedó ratificada cola declaración de la cultura sidrera como Patrimoniu Cultural Inmaterial de la Humanidá pola UNESCO, un fitu históricu que confirmó la centralidá de Villaviciosa nel procesu d’internacionalización y d’institucionalización del patrimoniu sidreru d’Asturies. Respecto a la incorporación a la rede, el rexidor declaró que “Llevábemos tiempu queriendo tar presentes na rede”.
Darréu, féxose un ampliu repasu hestóricu y cultural pa documentar los méritos propios que tien Villaviciosa pa pertenecer a Cider Cities.
Asina, recordó que la tradición y estudiu d’esta cultura recueyen aportaciones clásiques de Caveda y Jovellanos nel sieglu XVIII, xunto a investigaciones modernes, como l’estudiu Sidre y llagar tradicionales en tierres de Maliayo, d’Inaciu Hevia, y el llabor investigador de Luis Benito García, figura clave na institucionalización y na proyección internacional de la cultura sidrera asturiana.
Según destaca’l profesor Luis Benito García, nos sieglos XVI y XVII yá se constataba una notable actividá sidrera nel conceyu. Nel sieglu XVIII, la pomoloxía convirtióse na estaya agrícola más importante del municipiu. Avanzáu’l sieglu XIX, la producción de sidre desendolcóse sustancialmente pola influencia de dos procesos clave: la emigración a Ultramar y la industrialización y urbanización na segunda metá de la centuria.
El repasu históricu tamién punxo l’accentu na creación, en 1956, de la Estación Pomolóxica de Villaviciosa, xermín del actual SERIDA (Serviciu Rexonal d’Investigación y Desarrollu Agroalimentariu). Un añu más tarde, en 1957, la Diputación Provincial unvió a los sos téunicos, encabezaos pol director Sergio Álvarez (1930–2007), a un viaxe de formación por Inglaterra, Francia, Suiza y Estaos Xuníos. Nesi periplu, asistieron al Apple Blossom Festival de Washington, inspiración directa pa la creación, en 1960, del Festival de la Mazana de Villaviciosa.
El conceyu foi amás, recordó l’alcalde, l’escenariu del Primer Concursu Provincial de Sidre Natural en 1971, que se caltién hasta l’actualidá nes fiestes patronales de Nuesa Señora’l Portal. Cada añu, nel marcu del Festival de la Mazana, ofrézse la primer sidre del llagar pa bendición, combinando tradición social y relixosa nun ritual identitariu del conceyu.
La vida social de Villaviciosa xune celebraciones históriques como la Fiesta de la Sidra y el Concursu d’Escanciadores, dambos ente los más antiguos d’Asturies, y el puxu contemporaneu de la sidre casera, representáu dende 2016 polos Premios Mundu Collada, que rinden homenaxe a otru impulsor esencial d’esta cultura.
Non en baldre Villaviciosa ye sede del Conseyu Regulador de la DOP Sidre d’Asturies dende 2003.
Nel ámbitu del padremuñu cultural y simbólicu, el conceyu acueye dos obres emblemátiques: La Manzanera, de Mariano Benlliure (1935), y Exaltación de la Mazana, d’Eduardo Úrculo (1996), dambes erixíes n’honor de dos figures de la historia sidrera, Obdulio Fernández y José Cardín. El llegáu industrial y cultural de la marca histórica El Gaitero pervive cola so Fundación, la Colección Permanente y la Bodega Histórica de La Espuncia, nel emblemáticu emplazamientu de La Espuncia.
Hai que destacar que’l 10 d’ochobre de 2025, el Plenu de la Corporación acordó iniciar los trámites pa solicitar la declaración del Festival de la Mazana como Fiesta d’Interés Turísticu Nacional. Esta iniciativa complementa l’impulsu académicu que permitió la publicación de la obra Historia de la Cultura Sidrera de Villaviciosa y del Festival de la Mazana, del profesor Luis Benito García, director de la Cátedra de la Sidra y promotor destacáu del procesu que llevó a la declaración pola UNESCO.
El gobiernu municipal concluyó que, pola so trayeutoria histórica, productiva, social, institucional y cultural, Villaviciosa debe considerase unu de los nucleos esenciales de la Cultura Sidrera Asturiana, y reafirmó’l compromisu llocal nel reforzamientu del so papel como capital manzanera d’España, agora tamién con representación na rede europea de territorios productores de sidre.
La incorporación de Villaviciosa a esta rede europea, convirtiéndose na decimotercer llocalidá integrante de «Cider Cities», supón un reconocimientu al so papel históricu como territoriu sidreru y mazanera de referencia y abre nueves oportunidaes de collaboración con otres ciudaes europees, favoreciendo la proyección esterior del conceyu y l’accesu a proyeutos compartíos, programes europeos y redes de trabayu estables.
(Visited 3.469.144 times)
