Wilkin Aquiles gana en Les Arriondes y Colunga va acoyer la última prueba

Andrés Menéndez y Salvador Ondó completaron el podiu d’una cita que foi la penúltima del calendariu. La organización anuncia’l cierre en Colunga a primeros d’avientu, cola fecha exacta pendiente de confirmación.

LA SIDRA.— Wilkin Aquiles, de la sidrería La Montera Picona de Xixón, ganó’l XXXII Concursu d’Echaores de Les Arriondes, celebráu’l domingu 8 de payares. La prueba del Campeonatu Oficial d’Echaores d’Asturies formó parte del XXXV Certame de la Castaña y de la Güerta, dientro de la programación sidrera de Parres.

Según los resultaos espublizaos por Campeonato Escanciadores, el segundu puestu foi pa Andrés Menéndez, de la sidrería El Portal, de Villaviciosa, y el terceru pa Salvador Ondó, de sidreríes Tierra Astur.

El reconocimientu al meyor echador llocal foi pa Yerson, d’El Tonel de Gigi, de Les Arriondes. La Montera Picona recibió, amás, el premiu a la meyor sidrería del concursu.

Isabella Padrón gana na categoría sub-25

Na categoría sub-25, la ganadora foi Isabella Padrón, de la sidrería El Chaflán, de Xixón. Acompañáronla nel podiu Alexandra Castellanos, de Los Portales de Jaminón, de Sieru —Andarica Team—, y Leo Santacruz, de La Montera Picona, segunda y terceru, respectivamente.

La última prueba va ser en Colunga

La xornada permite aclarar la información difundida enantes del concursu: Les Arriondes nun acoyó la última prueba del Campeonatu d’Asturies, como comunicara inicialmente la organización y recoyera LA SIDRA na noticia previa. Foi la decimosexta y penúltima cita de la competición.

La organización señala agora que la última prueba va celebrase en Colunga a primeros d’avientu y que va anunciar próximamente’l día exactu. Va ser, polo tanto, la llocalidá colunguesa la que cierre’l calendariu del campeonatu d’esti añu.

Semeyes: Gonzalo Méndez / Campeonato Escanciadores.

Más información sobre l’echáu

• Salvador Ondó, campeón d’Asturies de 2025.
• Talleres pa deprender a echar sidre.