Xixón algama’l record con 9.833 culinos

Depués de dos ediciones ensin superar el récord y cola coincidencia del partíu del Sporting y les xornaes del hípicu, la idea xeneral yera que tampocu esti añu diba algamasela marca na Sablera Poniente, pero enquivocábense…

LA SIDRA – La tarde complicóse cuando entamó a orpinar alredor de les siete, pero nin la lluvia nin el vientu fixeron que decayere l’ánimu: con paragües, chubasqueros o a cencielles, miles de persones echaben culinos una y otra vegada, acompañando la música qu’animaben Alberto Rodríguez y Nerea Vázquez.

Amás de la masiva participación popular, el momentu más vistosu vivióse cola demostración de los echadores profesionales. Dende la terraza de la Escalera Tres, Wilkin Aquiles, Alejandra Venegas, Pelayo Rodríguez y Emilio Rubio arriesgáronse a echar culinos dende l’altura, nun escenariu que los dexaba a mercé de los elementos. L’esperáu homenaxe ‘creativu’ a Tino el Roxu quedó pendiente pa otra ocasión, pero la valentía de los profesionales dio un tonu especial a la xornada.

A midíaa que s’averaba la hora de preslle, los datos qu’aportaben dende les entraes volvieron l’optimismu: la cifra pasara los 8.000 y subía a bon ritmu. Pocu anantes del plazu final, con más de 9.000 echaores y la sidre esgotada en dalguna entrada, Alberto Rodríguez animó al públicu qu’esperaba fuera a unise al retu. Llamáu pol clamor popular del míticu “nun mos mires, xúnete”, l’emburrión final permitió superar la marca.

La notaria certificó l’ésitu y, con 9.833 brazos alzaos brindando al tiempu, quedó rubricáu’l récord. La xornada preslló colos himnos Xixón del Alma y Asturies Patria Querida, entonaos sentimientu y remataos con unánime “¡Puxa Asturies!”.

La folixa nun finó ellí: munchos siguieron p’andar a la Plaza Mayor, onde la Sociedá Torner siguía col ensayu de los Cancios de Chigre pa la cita del sábadu.