El Principáu d’Asturies dio un pasu importante pa la proteición del patrimoniu sidreru col anunciu de la apertura del trámite d’información pública de les futures aides destinaes a la restauración y conservación de llagares tradicionales.
LA SIDRA.- La Conseyería de Cultura, Política Llingüística y Deporte espublizó nel BOPA una resolución pola que se somete a opinión pública la propuesta de bases reguladores d’estes subvenciones, que tienen como oxetivu asegurar la pervivencia d’unos espacios clave na cultura de la sidre y na memoria rural asturiana.
¿En qué consiste’l trámite?
Nun se trata entá de la convocatoria d’aides, sinón d’una fase previa. Demientres 20 díes hábiles, -ello ye, fasta’l 26 de febreru- cualisquier persona o entidá interesada va poder:
- Consultar el borrador de les bases.
- Presentar allegaciones, suxerencies o aportaciones.
El testu ta disponible nel portal de participación ciudadana del Principáu, y les allegaciones puen presentase polos canales alministrativos avezaos.
Un padremuñu en riesgu
Los llagares tradicionales, munchos d’ellos venceyaos a cases particulares, quintanes o pequeños productores, enfréntense dende va años a problemes de desdexamientu, deterioru estructural, especulación, turistificación y falta de relevu xeneracional. Sicasí, siguen siendo una pieza fundamental p’atalantar la historia social y económica de la sidre n’Asturies.
Estes futures aides podríen suponer una ferramienta clave pa:
- Frenar la perda de llagares históricos.
- Facilitar obres de consolidación, reparación y caltenimientu.
- Poner en valor espacios venceyaos a la ellaboración tradicional de sidre.
Participar ye importante
Dende’l sector sidreru, asociaciones culturales, propietarios de llagares y ciudadanía en xeneral, anímase a participar nesti procesu, yá que les aportaciones feches agora pueden influyir directamente nel diseñu final de les aides.
La sidre nun ye solo una bebida: ye paisaxe, arquiteutura, saber popular yaidentidá. Caltener los llagares ye, tamién, caltener viva la cultura asturiana
